Cumulus congestus
El Cumulus congestus (scurtàa con: Cu con) a l’è ona nivola a svilùpp verticàl, che la parten al géner di cumul. La pò vèss alta fin ai 6km e l’è caratterizzada d’on aspètt compagn de la pànera montada o de la superfice de on cavolfiór [1].
Caratteristich[Modifega | modifica 'l sorgent]
La presenza de on cumulus congestus a l’è on indes de la presenza di corrent convettìv ind la troposfera bassa e media, che – se hinn assée fòrt – pòden indù anmò la nivola a slargàss foeura fin a trasformàss ind on Cumulonimbus calvus. A l’è fada su soratùtt de gottìnn sòra-fondùd che ghe dànn i tipìch contorni nètt. In su la soa sommitàa gh’hinn tanti crescénz, che ciascheduna l’è caosada de la spinta di corrent ascendent de l’aria, che pròvochen la condensazion del vapor de acqua che gh’hann de denter. A l’è pròppi per via de stì crescenz chì (apparentement piscinin per via de la granda distanza de osservazion) che la nivola la gh’hà on aspètt compagn de la pànera montada. Ind on quaj caso – sorattutt quand che i corrent ascendent hinn fòrt – l'aria che l’è pussée stabil piazzada sora el congèstus la ven trada su fin al so livèll de condensazion; a se crea inscì el pileus, ona nivula accessòria che la dura pòch (de solit on quaj minùt o on quaj secónd) [2], compagna d’on vèll suttìl a forma de cappusc sora vuna o pussée di crescénz del congèstus.
Giazzada e fibrillazion[Modifega | modifica 'l sorgent]
Qualora che i corrent convettiv vaghen adrèe a fa créss in altèzza el cumulus congestus, i gottin sora-fondùd che ‘l fànn su, rivarann fin ai strat de atmosfera pussée frècc e tacarànn a giazzass. Quèll stadi chì el marca la trasformazion del congèstus ind on cumulonimbus calvus. Quèll procèss chì el pò vèss notà intanta che se varden i nivol: i nivol giazzàd gh’hànn on aspètt fibrós, soli, senza crescènz e se troeuven sora i nivol fàd su domà de acqua. [3].
Di vòlt a l’è possibìl a vedè la fibrillazion, ch’a l’è on fenòmen che ‘l dura pòch segond e l’è defàtt l’epulsion de ciùff de nivola piscinìtt. La càosa l’è denter in de la noeuva spinta a’ndà anmò pussée su, ricevùda de l’aria per via del calor sconduu de fusion che ‘l se libera quand che l’aria l’è ‘drée a giazzàss [4].
Precipitazion[Modifega | modifica 'l sorgent]
El Cumulus congestus el pò vèss bon de caosàa di acqueri ma mai di fùlmen.[5]. Domà in di region tropicàj i acqueri portàa adrèe de quèll tipo de nivol chi a pòden vèss assée fòrt[1]. De sorapù on Cumul El congèstus a l’è bon de prodù ona tromba marina, quand che l'aria calda del mar quand che la va su la se mètt insèma a quèlla frèccia mettend la lisca a on mòto girant che ‘l prodùs ‘na nivola a pedrioeu o ona tromba marina de sòlit debol (EF0-EF1)
Riferiment[Modifega | modifica 'l sorgent]
- ↑ 1,0 1,1 World Meteorological Organization (a cura di), International Cloud Atlas (in en), Ginevra, Secretariat of the World Meteorological Organization, 1975, Vol. 1. 92-63-10407-7 URL consultad: 28 ottobre 2014.
- ↑ Gabriele Formentini (2009). Temporali e e Tornado (in italian). Alpha Test, 59. ISBN 978-88-483-0992-9.
- ↑ Gabriele Formentini (2009). Temporali e e Tornado (in italian). Alpha Test, 27. ISBN 978-88-483-0992-9.
- ↑ Gabriele Formentini (2009). Temporali e e Tornado (in italian). Alpha Test, 25. ISBN 978-88-483-0992-9.
- ↑ Gabriele Formentini (2009). Temporali e e Tornado (in italian). Alpha Test, 28. ISBN 978-88-483-0992-9.