Stema de Vares

Quell articol qì l'è scrivud in Lombard, cond l'ortografia Scriver Lombard.

Stema de Vares
Blasonadura
Troncad: al prim de ross al pal d'arjent; ol segond d'arjent

Ol stema storeg de Vares l'è un scud troncad, ind el prim de ross con un pal d'arjent; ol segond d'arjent.

Stema ofiçal de l'aministrazion comunala

Ol stema ofiçal del Cumun de Vares l'è: scud sanitig troncad, ind el prim de ross al pal d'arjent, ind el segond d'arjent; sormontad da una corona marqionala (cinq fioron e quater balle) e da un cimiero costituid da la figura qe la nass de un guerrier (san Vitor, patrono de la citaa) qe al porta ind la destra una bandera de bianc caricada de una crox rossa qe la sventola, e ind la sinistra la palma del martirio.

Storia

La plœ antiga rapresentazion del stema comunal l'è del 1347, sœ la copertina in legn di do copie dei Statuti Burgi et Castellatiae de Varisio (conservads ind el Arqivi Comunal): scud sanitig d'arjent a do canton de ross, destro e sinistro in capo; tœt intorna serrad da una fassa negra.

La'è probabel qe la corona (a l'epoca marqionala) e San Vitor (sant protetor de la citaa) i sies stait jontads ind el XVI secol.

ind el XVII secol ol stema sœ i at del Cumun l'è disegnad ind un scud oval, con sora una corona (d'or, con cinq fioron d'or alternads a quater perle), e la figura de San Vitor, con elmo e armadura roman, ol mantell, ind de la man destra una bandera triangolara bianca con una crox rossa, e ind la man sinistra una palma, simbol del martirio. Ol scud al g'ha tœt intoren di decorazion baroqe e, sota, una fassa con scrivid Comunitas Varissii.

ind el periodo del dominio napoleoneg, Vares l'è una di Bonnes villes de segonda class del Regn d'Italia e ol stema l'è: de ross, a la fassa-palo troncad d'arjent, al canton franc a destra cargad de una N d'arjent con sora una stella de l'istess.

ind el 1820 l'è faita domanda al govern de Viena per la concession del stema citadin, e ol 29 de november la cancelleria imperial al mandava l'autoriziazion a Milan. Per una qualc problem la risposta l'è mìa comunicada a Vares prima del 14 de jœn del 1854. Al stema i è staite cambiade i decorazion e la corona (qe ind la version del 1854 la g'ha di foiete invece di fioron).

Dal 2 de setember del 1938 fina a la nassida de la republica italiana l'è jontad al stema ol capo del litorio.

Galleria d'imajin

• 
  Ol stema napoleoneg.
• 
  Ol stema ofiçal al dé d'incœ.
• 
  La bandera

Bibliografia

• Manuale di immagine coordinata - Sit ofiçal del Cumun, pajine 6-7 (sezion Cenni storici giustificativi dello Stemma comunale), allegad de qesta pajina web Arqiviad qé: [1]