Spirit Sant

Quest articol chì l'è scrivud in lombard, con la Noeuva Ortografia Lombarda

El Spirit Sant (anca Spiritusant) a l'è, per tute i confession cristiane che ghe stann adree al cred de Nicea, l'è la terza persona de la Santissima Trinità e che, in del misteri de la fed, l'è per intregh Dia, che l'è vun, insema al Dia Pader e al Dia Fioeul. In del cred nicenee-costantinopolitan se aferma che "credom in del Spirit Sant, che l'è Signor e 'l dà la vita, e 'l proced del Pader (e del Fioeul, roba che la spartiss varie forme de cristianità), e che cont el Pader e 'l Fioeul l'è adorad e glorifegad, e l'ha parlad per mez di profeta". In del vangeli de Giovann l'è ciamad "paraclet", o ben "socorridor".

Per l'eresia ariana, inveci, el Spirit Sant a l'è stad cread de Dia, tant 'me el Fioeul. I confession minga trinitarie, tant 'me i unitarian, i testimoni de Geova e i cristadelfian, sostegnen inveci che el Spirit a l'è domà una forza del Signor, e minga una persona. Per i mormon, inveci, el Spirit Sant a l'è un member de la divinità, insema al Pader e al Fioeul, che comunque inn divinità partide ma, grazzia a la soa forza, lavoren 'me che fussen domà un Dia.

Anca i alter religion abramiteghe gh'hann di concet compagn: in l'ebraism a gh'è el Ruach haQodesh, che l'è el spirit e la forza de azzion del Dia, vist di cristian 'me el Spirit Sant, ma l'ideja de Dia fad su de pussee persone l'è vista 'me eresia o 'me shituf, menter in l'islam a l'è tirad a man quater voeulte in del Coran e l'è, in bas a la tradizzion di hadith, despess sociad a l'arcangiol Gabriell. In la tradizzion islamega, inveci, el paraclet del Giovann che ghe parlava el Gesù a l'è el Maomet.

Segond di studios de la storia di religion, a l'è ben possibel che i prim cristian se fussen ispirad a la religion ellenistega, che la spartiva la psiche del spirit di Dia, menter segond di alter la po vegnì de 'n desvilup ebraich.

La festa pussee importanta ligada al Spirit Sant a l'è la pentecost, indova che se celebra el dà del Spirit a la Gesa de part del Gesù.