Arianesim

Quell articol qì l'è scrivud in Lombard, cond l'ortografia Scriver Lombard.

L'arianesim l'è stait un important moviment ereteg, nassid ind el IV secol d.C. in Orient, e spantegads anc'pò in Ocident ind la segonda metaa del medem secol. Al g'ha havud una granda difusion sovertœt intra i popolazion jermanege.

Dotrina

Segond l'arianesim ol Crist al saress miga ol real Fiœl del Signor, ma adoma la plu granda dei so creature, e donca cond una natura diversa e una autoritaa inferior.

Storia

Ol nom al vegn del so fondador, Ario (256-336), un prevost de Lissandria d'Ejit. L'è stait jœdegada eretiga del prim Concili de Nicea del 325. La radicalitaa dei afermazion anti-ariane l'ha però portad dei oltre discussion ind la cristianitaa, e donca l'imperator Costanz II l'ha convocad dei olter concili, qe i ha ciapad dei decision plussee moderade. Ind el menter l'arianesim al perdiva vitalitaa in Ocident, ma al restava fort in Orient.

La fin de l'arianesim ind el Imper Roman al riverà adoma con l'imperador Teodosi I, qe l'ha convocad ol prim Concili de Costantinopel (381). I resterà adoma dei comunitaa picene qe i riverà a cambiar anc'pò ol rit del batesim.

Ind el menter però, grazie a'l predicar del vescov got Ulfila, tants popoi jermaneg i s'era convertids del paganesim a'l cristianesim arian, e qesta diferenza la sarà vun dei problema de l'integrazion coi romaneg despos dei invasion barbarege. Adoma intra ol VI e l'VII secol, un poo a la volta, ge sarà anc'pò la so conversion a'l catolicesim, e l'arianesim al descomparirà.

Ol neo-arianesim

Anca se, a diferenza del nestorianism, a l'è descomparid, a g'è staits dei moviments o dei persone qe i g'ha havuds dei penser qe i ha svexinads a qell arian, e i è ciamads neo-arian.

Vun dei esempe plussee cognossids a l'è qell dei Testimone de Jeova, qe i sostegn qe ol Jesuu a l'era una creazion de Dé. Anca ol Newton al pensava qe al fœss insé, anca se l'haveva scondid i so penser qe, a'l temp, i era considerads ereteg.

Riferiments