Segnalament ferroviari de la metropolitana de Milan

Quest articol chì l'è scrivuu in lombard, grafia milanesa.

El segnalament ferroviari de la metropolitana de Milan a l'è doperaa per garantì 'na circolazion corretta e segura di treni e 'l vària a segonda de la linia. Dal 2013 i lign 1, 2 e 3 a hinn controlaa de 'n unega sala operativa progettada de la Alstom.

Linia 1, 2 e 3

Segnalament a blocch fiss

La linia 1 e 2 han compartii, finna al 2011, el midemm segnalament a blocch fiss, che 'l dopera i lus di semafer per indicà sia la circolabilità sia la velocità de tegnì. Dal 2011 la linia 1 l'è stada convertida a 'n sistema a blocch mobil cont operatività automatica di treni, e 'l sistema el resta doperaa domà in su la linia 2, indova che 'l gh'avarìa de vèss sostituii cont el noeuv sistema per el 2024.

I segnai a hinn a vela tonda se mittuu a destra, sens de circolazion legala, e quadraa se mittuu a sinìstra. Quand che hinn in superfiss doperen la midemma forma di semafer del segnalament FS, in galleria inveci a hinn unii in d'on unega vela e a foeugh de color, compagn di semafer di auto.

De solit domà i stazion e la sezion direttament dedree a 'n treno in passagg a hinn protegiuu de 'n ross imperativ, anca per evità de fermà i treni in galleria, e gh'è, dedree de ògni treno, on para de sezion in ross, vuna gialda e poeu el verd. El giald a l'è doperaa anca in di situazion de scarsa visibilità o per reson de sicurezza o ambientaj.

Segnai de marcia
Immagin	Color	Significaa	Limit de velocità
	Ross	Via impedida imperativa	0 km/h
	Ross con cartell P fiss o luminos	Via impedida permissiva	15 km/h cont marcia a vista
	Ross-giald	Via libera cont limitazion (a bassa velocità)	30 km/h Del 2019 in M2 25 km/h
	Giald	Via libera cont limitazion (a media velocità)	50 km/h Del 2019 in M2 45 km/h
	Verd	Via libera condizionada	85 km/h (M1) 70 km/h (M2, del 2005)
Segnai de manoeuvra
Segnal	Color	Condizion
	Ross	Manoeuvra impedida
	Ross-giald	Manoeuvra permessa con prudenza

I segnai ausiliari, per esempi de rallentament o de cantier, hinn compagn de quej doperaa in di Ferrovij del Stat italian.

Ripetizion in gabina

I treni de la linia 2 a hinn dotaa - e quej de la linia 1 eren dotaa - de 'n sistema de ripetizion in gabina che, a differenza de quell standard italian che 'l ripet el segnal passaa, l'avvisa de l'aspett prossim segnal.

Segnalament a blocch mobil

Linia 1

Dal 2011 in su la M1 a l'è staa installaa on sistema de segnalament che 'l permettaria de rivà, in cas de necessità, a 'na frequenza de 90 segond a treno, prima limitada a 120. El sistema el dopera ATC a blocch mobil che 'l regola costantement la distanza di sicurezza di treni. L'ATO, poeu, el regola la velocità in manera de respettàlla. I semafer doperaa in del sistema a hinn a dò lus: Vuna rossa, che la reppresenta el via impedida e vuna bianca o verda, che la reppresenta la via libera, cont la possibilità de doperà l'esercizzi interstazional, pussee lent e reppresentaa domà de 'na lus bianca, in cas de necessità 'me di guast o 'n period de bassa frequenza.

Linia 3

La linia 3 a l'è de la soa creazion in di agn '90 squasi completament automatizzada, cont ATC, ATP e ATO, e 'l roeul del macchinista a l'è limitaa dònca a dà el consens per sarà i port e fà partì el treno.

I semafer ferroviari doperaa in su la linia 3 reppresenten donca la via libera (ross e verd o bianch) o la via impedida (domà ross), sènza reppresentà di limitazion de velocità, che hinn deciduu poeu del sistema, e in teoria servissen domà per sicurezza, degià che in esercizzi ordinari a hinn essezialment inutil.

Segnalament ATC

Color	Significaa	Condizion
Ross	Via impedida	El treno el gh'ha de fermàss prima del segnal
Bianch	Via libera cont marcia interstazionala	El treno el gh'ha la via libera finna a la prossima stazion, doperaa in cas de guast o de marcia degradada
Ross-bianch	Via libera	El treno el gh'ha la via libera e 'l gh'avarà de respettà i indicazion del sistema

Lign 4 e 5

I lign 4 e 5 hinn intregament automategh e doperen on sistema de segnalament automàtich e computerizzaa de la Ansaldo che 'l dopera no di semafer classich.

'Sto sistema el permètt, in teoria, de mandà in su la linia on treno ogni 75 segond, ma in pratega la frequenza minima a l'è de 90 segond, doperada soratutt in occasion di manifestazion al Stadi.