Roberto Bernardelli
|
Quest articol chì l'è scrivud in lombard, con la Noeuva Ortografia Lombarda |
El Roberto Bernardelli (Milan, 31 de sginer 1949) a l'è un politegh e imprenditor italian.
Biografia[Modifega | modifica 'l sorgent]
Imprenditor in del setor albergher, el va in politega in di agn '80 con la Liga Autonomista Lombarda de l'Umberto Bossi, indova che l'è candidad in del 1983, senza vesser elesgiud. In del 1987 l'è in tra i fondator del Partid Pensionad in del che el deventa consilier a Trevij e assessor a Milan. In del 1992 el fonda la Liga Casalinghe-Pensionad, che la gh'ha no de sucess.
El torna poeu in la Liga Nord e in del 1994 el riess a finì in Parlament, in del collegi de Milan 8 de la Cambra di Deputad, che 'l perd in del 1996 quand che la Liga la scerniss de correr indeperlee. Quand che la Liga la lanzia el Bloch Padan a l'è capo del moviment "Padania Pension Segura", deventad poeu "Pensionad Padan".
In del 2000 l'è elegiud consilier regional de la Lombardia con la Liga, che la molla l'ann dopo perchè la ritegn trop vesina ai posizzion del Silvio Berlusconi, e 'l fonda la Liga Padana Lombarda. In del 2004 l'è candidad president de la Provincia de Milan ma el ciapa domà l'1,8% di consens e in del 2005 l'è minga riconfermad al Pirellon.
Dopo di elezzion italian del 2008 el taca a colaborà pussee cont di alter leader del mond padanista compagn del Giulio Arrighini e del Max Ferrari e i vari moviment deciden de fondà Lombardia Autonoma, de che 'l deventa president, e che 'l cambia nom poeu in Union Padana e Independenza Lombarda.
In del 2014 l'è menad via insema a di alter independentista compagn del vegg leader de la Liga Veneta Franco Rocchetta e l'ex serenissim Luigi Faccia e l'è accusad de havégh fad una sociazzion eversiva e de havégh di armi de guerra, ma l'è relassad poch dopo.
In di elezzion ministrativ del 2016 l'è candidad a Milan insema a la Liga Nord, in d'un acord che 'l permet a di esponent de Independenza Lombarda de corer sota el simbol leghista e in del marz 2017 el torna a colaborà cont i alter partid del mond independentista con la fondazzion de Grande Nord.