Presépe di Sabiù

Quest articul chì l'è scriìt in lumbart, grafia cremàsca.

Al Presépe di Sabiù l'è an alestimént che sa fa töcc i agn a Crèma an dal quartiér di Sabiù. Dal 1989, l'an quand l'è mòrta la persùna che 'l la creàt, l'è intitulàt a Giuàn Algìs (Giovanni Alghisio).

Stòria

^[1]

Al nóm al vé dal quartiér di Sabiù 'ndu sa tróa al preźépe, an via Rossi Martini.

L'idéa l'è nasìda an dal 1989 quand 'na maźnàda da persùne, che dópo le fundarà l'asuciasiù “I amis dal Preźéepe”, i cumincià a cüstrüì i pröm caźòt e col témp i sa slargàcc fin a ocüpà triméla méter quadre da teré.

Al céntro gh'è, natüralmént, la capàna co' la Madòna, San Giüsèp e al Bambì, ma antùrne i g'a tràcc sö dèle baràche che le fa vèd al mùnd da le nóste campàgne an da la pröma metà dal nófcènt. Ògne an i g'a tacàt argóta con mudèi da persùne a grandèsa d'òm e róbe vìre da i témp pasàt catàde sö dapertöt.

Sa pól vèd isé cuma l'éra la cà di cuntadì, le stàle, le butìghe, al paìs da 'n ólta. E gh'è po' töcc i mestér: al mülenér, al frér, l'arutì, la làandéra, la sartùra, al marengù, la bàlia e ótre mestér amò: gh'è püsé da cént mudèi. E gh'è po' al cunvént, la scóla, al cìrco, la fàbrica da campàne e la stasiù. Da sólet sa dérf al preźépe al dé pröma da Nedàl e al stà dervìt fin a la fine da genàr.