Orazzion de Gesù

Quest articol chì l'è scrivud in lombard, con la Noeuva Ortografia Lombarda

Cristograma con sora l'orazzion in romen e 'l ☧

L'orazzion de Gesù, anca orazzion del coeur, a l'è 'n orazzion curta doperada soratut in del cristianesim oriental, ma che l'è recognossuda anca de quell ocidental, che la dis:

O Signor Gesù, fioeul de Dia, che te gh'heet pietà de mi pecador

Despess repetuda un frach de voeulte 'me forma de meditazzion o de ascetism, cont anca una corda de orazzion, la saria l'orazzion sostegnuda del Paol de Tars in del Noeuv Testament e l'è did, in del Philokalia, che l'è bona de netà el coeur e la ment. Per el Teofan el Reclus a l'è l'orazzion la pussee forta de tute, grazzia al Sacher Nom de Gesù.

Anca se tipega de la cristianità orientala, l'è comunque tirada a man in del Catechism de la Gesa Catolega e doperada anca di anglican cont i so rosari. La dotrina ortodossa in su quell'orazzion chi l'è del secol XIV e l'è stada fada del Grigoeu Palamas, i catolegh l'hann refudada fina al secol XX, quand che el Giovann Paol II l'ha ciamad el Palamas "un gran sant" e gh'ha recognossud el roeul de svesinà l'om a Dia e l'ha paragonad la soa orazzion repetuda al rosari ocidental.

L'è ciamada anca orazzion del publican, perchè la se fonda in su la manera de orà del publican in la parabola del farisee e del publican cuntada in del Vangeli de Luca, o ben "Dia, che te gh'heet pietà de mi".

Riferiment

• La preghiera umile ottiene misericordia

Bibliografia

• The Jesus Prayer: Learning to Pray from the Heart, by Per-Olof Sjögren, trans. by Sydney Linton; First Triangle ed. (London: Triangle, 1986, cop. 1975) ISBN 0-281-04237-3

Vos corelade

• Pader Noster
• Ave Maria