Lesg razziai (Italia)

De Wikipedia
Lombard Quest articol chì l'è scrivud in lombard, con la Noeuva Ortografia Lombarda
La testada del Corriere che la nonzia 'sti lesg chi

I lesg razziai (leggi razziali in italian) a inn stade un insema de lesg in pè in del Regn d'Italia fassista a partì del 1938 e poeu in la Republega de Salò, fade soratut contra la popolazzion sgiudea italiana. Nonziade a Triest del Mussolini in Piazza Unità d'Italia, del Municipi, eren ciamade del regim "lesg per la defesa de la raza". Inn stade abolide de l'inscì ciamad Regn del Sud in del sginer 1944, dopo che l'Italia l'era deventada co-belligeranta di Liad.

'Sti lesg chi, fade soratut per soldà el ligam con la Germania nazista, eren no popolar anca con di omenoni del regim compagn de l'Italo Balbo e Dino Grandi e, in sgeneral, gh'haveven no gran sostegn de la popolazzion italiana, che la conviveva in manera assee pacifega cont i piscinine comunità sgiudee in del Pajes, e anca el Mussolini midem, in del 1929, l'haveva parlad de 'na civiltà mediterranea comun che gh'haveva dent sia i italian che i sgiudee che, voramai, eren part de la civiltà italiana dopo de secoi de integrazzion.

Una spiegazzion de l'epoca in sui noeuve mesure in sui sgiudee

I disposizzion hann tolt via vari dirit civil di sgiudee, la possibilità de lavorà in del setor publegh e de andà in di scoeule de volt nivell, pussee inanz gh'hann tolt via anca i proprietà, la possibilità de havégh di domestegh italian e inn stad condanad a l'esili interno, tant 'me i nemis politegh, e gh'hann tolt la possibilità de fà vari mester. I lesg, comunque, revardaven anca i popolazzion di colonie italeghe, che eren partide in nativ e eritree. Eren proibid anca i raport sessuai e i matrimoni in tra i italian, i african e i sgiudee.

A sostegn de 'sti mesure l'è stad publegad el Manifest de la Raza prima e, dopo, el Manifest di Razzista Scentifegh che, cont un insema de razzism biologegh e de storia, el deciara che i italian partegnen a 'na raza ariana, menter che i sgiudee no e donca inn no italian, e che donca besognava partì i europee di minga europee.

El passà de 'sti lesg l'ha vist la linia del Partid Nazzional Fassista deventà semper men autonoma de quella del Partid Nazzionalsocialista di Lavorent Todesch e l'Italia deventà semper pussee ligada al Terz Reich, tra l'alter anca el San Marin, a l'epoca governad del Partid Fassista Sammarines, l'ha tirad foeura di so lesg compagne, del tut ispirade a quei italiane e che ghe proibiven ai italian de violà i lesg italiane in su la raza in sul territori de la Serenissima Republega. 'Sti lesg chi hann menad l'Israell a ciamà el San Marin collaborazzionista, ma la pupart di sanmarines la ritegn, inveci, che fussen domà per fà content i vesin italian e che la Republega la gh'habia dad asil a 'n bell poo de sgiudee perseguitad.

Riferiment[Modifega | modifica 'l sorgent]

Alter proget[Modifega | modifica 'l sorgent]

Vos corelade[Modifega | modifica 'l sorgent]