Primo Mazzolari

De Wikipedia
Jump to navigation Jump to search
Lumbard ucidental Quest articol chì l'è scrivuu in lombard, grafia milanesa.
Cremuna, làpid dedicada a don Primo.

El don Primo Mazzolari (Cremona, tredes de genar del 1890 - Bòsul, dodes de april del 1959) a l'è staa on preved, scritor e partigian italian.
Cognossuu 'me el prevost de Bozzol, a l'è staa vuna di figur pussee important del catolicesim italian del primm Noeuvcent. El sò penser l'ha anticipaa ona quai istanza dotrinaria e pastorala del Concili Vatican II (per esempi in sul tema de la Gesa di Pover, de la libertà religiosa, del pluralism, del dialogh...), tant che gh'hann daa quasi del profeta.
In sul pian politegh, inscambi, el sò fà e i sò insegnament hann semper marcaa ona oposizzion forta al fascism: tra l'alter, duranta la Segonda Guerra Mondial l'ha salvaa on monton de perseguitaa del regimm (giudee, antifascista...).

Biografia[<small>Mudifega</small> | mudìfica 'l sorgènt]

La formazzion eclesiastega[<small>Mudifega</small> | mudìfica 'l sorgènt]

Primo Mazzolari l'è nassuu al princippi del 1890 a Santa Maria, ona frazzion de campagna de Cremona. A dodes agn l'è andaa in seminari. Giamò quand l'era gioven (come a poeudom lengg in del sò diari) l'ha marudaa di idei in su la Gesa e in su la società che l'avaria mantegnuu anca de grand: la fiducia a la modernità, el sò patriottism de tipo risorgimental e democrategh, l'afermazzion de la soa libertà de coscenza.
El 24 de agost del 1912 l'è staa nominaa preved a Veroeula Noeuva del vescov Giacinto Gaggia: el primm de settember de l'istess ann l'è staa nominaa curaa a Spinadesch, e 'l 22 de magg del 1913 l'è andaa a Santa Maria.
A l'è staa a favor de l'interventism democrategh, e l'è andaa soldaa in del 1915. In del 1918 a l'è vegnuu capellan militar. In del 1919 el vegna decoraa, per poeu vess congedaa in del 1920. El 31 de dicember del 1921 l'è nominaa prevost a Sigognera (frazzion de Viadana); infina el vegna trasferii a Bozzol (1932) indè che 'l restarà fina a la mort.
In del 1925 l'è denonziaa di fascista perchè 'l s'è refudaa se cantà el Te Deum despoeu de l'atentatt fallii al Mussolini. In del 1931 ghe sparen adoss de nocc, ma ghe la fann minga a colpìll.

Resistenza[<small>Mudifega</small> | mudìfica 'l sorgènt]

Despoeu del vott de settember del 1943, l'ha tolt part in manera ativa a la guerra de Liberazzion, e l'ha incoraggiaa a combatt anca i gioven del sò paes. Per 'sta reson l'è anca finii in preson. El gh'ha 'vuu de viv de clandestin fina al 25 de april del 1945, per pagura de vess ciappaa di fascista.

L'Adesso[<small>Mudifega</small> | mudìfica 'l sorgènt]

In del 1949 l'ha fondaa el giornal quindesinal L'Adesso, del qual a l'era el direttor. Quell che 'l scriveva l'ha tiraa dedree i sanzion de la Gesa, che l'ha ordinaa che 'l giornal el fuss saraa su in del 1951. A luj de l'istess ann, gh'hann ordinaa al preved de minga predicà foeura de la diocesi senza el permess, e de minga scriv di articoi senza ona revision de l'autorità eclesiastega. In del november de l'istess ann el giornal l'ha poduu tornà a vess publicaa, ma don Primo l'è staa constringiuu a lassà l'incaregh de direttor: a bon cunt, l'ha seguttaa a scriv di articoi cont el dovrà di pseudonom. In del 1954 el giornal el s'è tiraa adree di sanzion noeuv, per via de on quai articol in sul tema de la pas; donca don Primo l'è staa obligaa a predicà minga foeura de la soa parocchia, e de publicà minga articoi a meret de tema sociai.

El penser[<small>Mudifega</small> | mudìfica 'l sorgènt]

Al prinicppi di Agn Cinquanta el don Primo l'ha desviluppaa on penser social vesin ai class pussee deboi (Nissun l'è foeura de la carità) e ai valor del pacifism. A bon cun, anca se l'istituzzion le perzepitava, el sò messagg el s'è minga smorzaa; inscambi, el gh'ha 'vuu on'influenza bella forta, e l'ha anca ispiraa el penser de alter preved "anticonformista", compagn del don Lorenzo Milani.
In del 1955 l'ha scrivuu (senza firmàll) el test Tu non uccidere, indè che la vegniva taccada la dotrina de la "guerra giusta", in favor de la non-violenza, che la saria stada de sostegnì cont on moviment de resistenza cristiana contra la guerra. Dedree de 'sto penser a gh'era la consapevolezza de 'se che voreva dì la bomba atomega, che l'aveva cambiaa anca i parameter per podè giustificà l'usagg de la guerra.
A bon cunt, l'è staa domà invers la fin di Agn Cinquanta, in di sò ultem mes de vita, che don Primo l'ha cominciaa a 'veggh i primm atestazzion de stima de la gerarchia de la Gesa. In del november del 1957 el vescov de Milan Montini (el fütür Pàol VI) l'ha ciamaa a predicà in de la proppia arcidiocesi; in fina, in del 1959 el papa Gioann XXIII l'ha ricevuu in üdienza privada, e l'ha saludaa publicament comè "...tromba del Spiret Sant in del Mantoan...".

Bibliografia[<small>Mudifega</small> | mudìfica 'l sorgènt]

  • Il mio parroco. Confidenze di un povero prete di campagna (1932, Dehoniane)
  • La più bella avventura. Sulla traccia del 'prodigo' (1934, Dehoniane)
  • Lettera sulla parrocchia. Invito alla discussione (1937, Dehoniane)
  • Il samaritano. Elevazioni per gli uomini del nostro tempo (1938, Dehoniane)
  • I lontani. Motivi di apostolato avventuroso (1938, Dehoniane)
  • Tra l'argine e il bosco (1938, Dehoniane)
  • La via crucis del povero (1938, Dehoniane)
  • Tempo di credere (1941, Dehoniane)
  • Anch'io voglio bene al Papa (1942, Dehoniane)
  • Dietro la Croce (1942, Dehoniane)
  • Impegno con Cristo (1943, Dehoniane)
  • La Samaritana (1944, Dehoniane)
  • Il compagno Cristo. Vangelo del reduce (1945, Dehoniane)
  • La pieve sull'argine (1952, Dehoniane)
  • Il segno dei chiodi (1954, Dehoniane)
  • La parola che non passa (1954, Dehoniane)
  • Tu non uccidere (1955, San Paolo)
  • La parrocchia (1957, La Locusta)
  • I preti sanno morire (1958, Dehoniane)
  • La Carità Del Papa, Pio XII e la ricostruzione dell'Italia, Edizioni Paoline, 1991

Ligamm de foeura[<small>Mudifega</small> | mudìfica 'l sorgènt]