Franzesch Maria Righin
|
Quest articol chì l'è scrivud in lombard, con la Noeuva Ortografia Lombarda |
El Franzesch Maria Righin (Milan, 9 de fevrer 1584 - Milan, 24 de avril 1658) a l'è stad un architet lombard.
Maester del Dom de Milan, la soa dinastia de architet l'è scominciada col pader e l'è fornida cont un nevod del 1800: l'è regordad per la costruzzion de gese e alter palazz. La soa prima oeuvera l'è stada la Gesa de Sant Isep, poeu gh'è stad el Palazz de Brera, la faciada e la curt de la Cà Granda, el Collegi Elvetich, el Palazz Annon, el Palazz Durin, la Gesa de la Cà Granda e la Cà Sormana e, foeura de Milan, l'Almo Collegi Borromee a Pavia, la Villa Resta Mari a Votion, la Frisiani Mereghetti a Corbeta e la villa Ghirlanda Silva a Cinisell Balsom.
L'è stad ben pussee ativ, e in tuta la Lombardia, per l'architetura eclesiastega, indova che l'ha fad su, fornid o fad pussee bone i gese milanese de San Bartolamee, San Lissander in Zebedia, San Fedee, San Giorg, San Giovann Quater Facc, Santa Maria a la Porta, Santa Marta, Santa Maria in Brera, Santa Maria Secreta, San Peder in Cornaree, San Vitor di Legnamer e la Colona del Verzer.
Foeura de Milan l'ha lavorad ai gese de San Bernardin a Biaa, ai ges de San Michel e San Giovann a Bust Grand, al Palazz Ducal de la Certosa de Pavia, a la gesa de San Benedet de Crema, a la gesa de San Giorg a Cugion, al santuari de Sant Invenzi a Gasgian, a la basilega de San Magn a Legnan, a la gesa de San Roch a Miasin, a la Gesa di Sant Jacom e Felip a Pavia e, infin, a la gesa de Sant Agnesa a Soma.
Riferiment
[Modifega | modifica 'l sorgent]Alter proget
[Modifega | modifica 'l sorgent]
Wikimedia Commons el gh'ha dent imagin o alter archivi su Franzesch Maria Righin
