Gesa de la Cà Granda
 |
Quest articol chì l'è scrivud in lombard, con la Noeuva Ortografia Lombarda |
La gesa de la Cà Granda, dedicada a la Maria Nonziada, a l'è una gesa parochial de Milan: la se troeuva apont dent a la Cà Granda e, per vegg dirit de l'Ospedal Magior, a l'è una parochia e l'arcivescov de Milan a l'è el so curad[1]: incoeu la fa anca de capella per i student de l'università di Studi de Milan.[2]
Storia
[Modifega | modifica 'l sorgent]L'è stada fada su del 1637 in su proget del Giovann Batista Pessina, del Franzesch Maria Righin e del Fabi Mangon cont el finanziament de la familia Carchen[1]: l'è doperada oltra che 'me gesa 'me cimiteri, fina ai decret austriegh del secol XVIII che proibissen de meter sota i mort in cità.[3] A gh'era sgiamò una capella, minga fornida, in di prim temp de l'ospedal, che però la bastava minga per i so besogn: gh'è stad anca un proget de fàlla su ancamò del Carlo Borromee in su proget del Pellegrin Tebald.[2]
Cont i cinch giornade de Milan e Porta Tosa mituda sota assedi del Feldmaresciall Radeschi el Governo Provisori de Lombardia ghe dà el permess a l'ospedal de meter sota i mort in la revoeulta e insì la deventa un sacrari per lor fina al 1895, quand che l'è fad su el noeuv memorial in la piazza che poeu gh'hann dedicad e i oss inn spostad.[4][3] Intorna al 1850 inveci a l'è fad su el cor e in tra el 1872 e 'l 1873 inn tirad su i altar laterai menter del 1884, per i 300 agn de la mort del Borromee, inn mitude di vedrade del Pompee Bertin in su dissegn del Lodovigh Pojagh.[2]
La gesa la subiss di bei dagn in la segonda guerra mondiala ma, a diferenza de la pupart de la Cà Granda, a l'è minga trada sgiò, anca se 'l so dedent a l'è restruturad fiss.[1][5] In di agn '80, per adatàlla ai disposizzion del Concili Vatican II, a l'è mitud un altar a tavola insema a una pedana de legn.[2]
Del 2013, cont un finanziament de la Fondazzion Cariplo e de la Region Lombardia la cripta a l'è restaverada in manera conservativa e inn trovad di fresch de danze de scheleter del Volpin.[3]
Architetura
[Modifega | modifica 'l sorgent]
La gesa l'è a pianta quadrada e l'è spartida in du pian: antigament de quell de sora se andava dent de l'ospedal e de quell de sota di Navili, menter incoeu in quell de sota se va dent de una porta lateral.[3] La gesa la gh'ha minga una faciada vera e propia, desgià che se va dent del cioster.[2]
Sora de l'altar magior a gh'è una pala del Guercin fada del 1639.[3]
La cripta
[Modifega | modifica 'l sorgent]La cripta, che incoeu se po visità 'me part del Musee de la Cà Granda, la gh'ha dent un altar e di rest, tegnud mal, del sacrari che heven fad per i mort in di cinch giornade: sota gh'è anca un sepolcher, indova che se meteven i mort, circa 150 mila.[4]
Gh'è in mostra anca di lapid e di statovete di mort: quella pussee interessanta l'è quella de la Florida, una fiolina che l'è morta e i che sgent gh'hann fad un monument in soa memoria.[3]
Riferiment
[Modifega | modifica 'l sorgent]- 1 2 3 La Chiesa della Beata Vergine Annunciata | Policlinico MI
- 1 2 3 4 5 Milano (MI) | Chiesa di Santa Maria Annunciata - BeWeB
- 1 2 3 4 5 6 Ca’ Granda di Milano chiesa della Beata Vergine Annunciata e la cripta | I gufi narranti
- 1 2 Cripta e Sepolcreto | Policlinico MI
- ↑ La chiesa dell'Annunciata, interna alla Ca' Granda di Milano, gravemente danneggiata dai bombardamenti così come l'intero complesso. Il cortile Maggiore è completamente ingombro di macerie, agosto 1943
Alter proget
[Modifega | modifica 'l sorgent]
Wikimedia Commons el gh'ha dent imagin o alter archivi su Gesa de la Cà Granda
