Episodi de Vikings (prima stasgion)

De Wikipedia
Quella vos chi l'è orfena Quella vos chi l'è orfena, o ben la gh'ha minga di conligament che riven de alter vos.
Meten dent almen vun che 'l vaga ben e toeu via quella vis chi.
Lombard Quest articol chì l'è scrivud in lombard, con la Noeuva Ortografia Lombarda

Vos principala: Vikings.

La prima stasgion de la serie televisiva Vikings, composta de 9 episodi, a l’è stada trasmetuda in sul canal canades History del 3 de marz al 28 de avril del 2013.[1]

In Italia, la stasgion l’è andada in onda in primissima vision in su Rai 4 del 28 de masg al 23 de luj del 2014. I titol italian a inn stad sgiontad quand che la stasgion l’è stada publicada del Netflix.

El grup principal di ator de questa stasgion chì al’è fad su del Travis Fimmel, la Katheryn Winnick, el Clive Standen, la Jessalyn Gilsig, el Gustaf Skarsgård, el Gabriel Byrne, el George Blagden, el Donal Logue, la Alyssa Sutherland.

nº Titolo original Titol lombard Prima TV Canada Prima TV Italia
1 Rites of Passage Riti de passagg 3 de marz del 2013 28 de magg del 2014
2 Wrath of the Northmen El foton di nordich 10 de marz del 2013 4 de sgiugn del 2014
3 Dispossessed Espropriad 17 marzo 2013 11 de sgiugn 2014
4 Trial Dificoltà 24 de marz del 2013 18 de sgiugn del 2014
5 Raid L'atach 31 de marz del 2013 25 de sgiugn del 2014
6 Burial of the Dead Sepoltura 7 de avril del 2013 2 de luj del 2014
7 A King's Ransom El riscat d’on rè 14 de avril del 2013 9 de luj del 2014
8 Sacrifice Sacrifizzi 21 de avril del 2013 16 luj 2014
9 All Change Cambia tut 28 de avril del 2013 23 luj 2014

Riti de passagg[Modifega | modifica 'l sorgent]

Archivi:VikingsTitles.png
Imagin tirada sgiò de la sigla.

Trama[Modifega | modifica 'l sorgent]

Scandinavia, 793 d.C.. El Ragnar Lodbrok a l’è on pirata che ‘l fa di incursion in terre orientai considerade povere e indifese al servizzi del cont Haraldson. La soa ambizzion l’le mena a volé viagià vers ocident, in di terre riche e considerade sfavorevol perchè governade de di sovran potent. El Ragnar el se porta al paes de Kattegat per la cerimonia de inizziazzion a la vita madura del fioeul de dodes ann Bjorn e l’incontra el sò fradell Rollo per spiegàgh la manera che ‘l voeul navigà vers ovest. In del palazz del cont, a l’inviada se ten on process che ‘l finiss con la condana per du colpevol vun, de robalizzi e l’alter de mazzament, donca a se ten la cerimonia per el fioeul del Ragnar e on alter bagai. El riva el moment de tirà a man i ladrarie de l’estad che la gh’ha de vegnì e ‘l Ragnar l’esponn a la sgent e al cont la soa idea de tentà un viagg per mar vers i terre ocidentai. El cap el refuda la sua proposta e, in d’ona conversazzion privada, l’intima al Ragnar de provàgh pù a metes contra ai sò decision. Smorfiad, el Ragnar l’interpella on indovin ma oten nò ona risposta sodisfacenta. El decid de procuràss el bastiment per sò cunt e donca ‘l va in de l’amis Floki, legnamer e costrutor de bastiment e, in del discuter di carateristiche del bastiment, el ghe promet de ripagàgh i spese per el bastiment cont el botin conquistad. Quan che ‘l torna a cà, el Ragnar el ven ragiont del Rollo e lor du i discuten del scerna de l’ecupagg e del fatto che tucc du i gh’havarissen havud l’istess grad in de l’aventura. El Ragnar el se slontana per cercà di dei on segn positiv per la sua impresa, inveci el Rollo el ne profita per andàgh adree a la mier del fradell Lagertha, che l’le refuda con decision e ona certa lapa. In seguit el Ragnar, el Floki e el Rollo cont on collaod de poch temp inauguren el bastiment apena costtruid, e intanta l’om de fiducia del cont Haraldson incaricad de tegnì de pista el Ragnar je osserva.

El foton di nordich[Modifega | modifica 'l sorgent]

Trama[Modifega | modifica 'l sorgent]

El cont Haraldson el probiss de andà a fa di incursion vers ovest, ma ‘l Ragnar, el Rollo, el Floki e vergun d’alter i deciden de navigà istess in quella direzzion là. El Ragnar el proibiss a la Lagertha de partecipà ai ladrarie in Inghilterra, nonostant che lee la voeula andà a tutt i cost. Intrantanta vun di omen de fiducia del cont Haraldson el ven invidad del cont medem, con l’ingann, a 'ndà in let insema a la mier del cont, la Siggy: quest el ghe farà perder la fiducia del cont che ‘l le farà copà. El Ragnar e i sò compagn i parten cont el bastiment fad su del Floki e riven in sui coste de l'Inghilterra, a la noeuva manera navigazzion imprenduda del Ragnar. Desbarcad in sui cost britaniche de la Northumbria, i vichingh troeuven el monaster de Lindisfarne e deciden di sachegiàll, e copà tucc i monegh che gh’inn denter, via che on quaivun che porterann a cà ‘me s’ciav. In fra ‘sti-chì a gh’è anca l'Athelstan, on monegh sgiovin che ‘l parla la lengua soa de lor. El Ragnar el decid de salvàgh la vita, col metes contra al Rollo che inveci el voeul copàll.

Espropriad[Modifega | modifica 'l sorgent]

Trama[Modifega | modifica 'l sorgent]

Dopo el success de l'incursion, el Ragnar e ‘l sò ecupagg i tornen trionfalment a cà col sò rich botin. El cont Haraldson el convoca subit el Ragnar in la sala granda, indove che ‘l rivendica e tut el tesor. El cont Haraldson el permet a l’ecupagg de ciapà ona roba del tesor e ‘l Ragnar el cata foeura l’Athelstan ‘me sò s’ciav. De l’Athelstan, el voeul imprender la strutura politica dell'Inghiltera e ‘l voeul imprender l'old english. In su comandà del Ragnar, l’Haraldson el sanziona ona noeuva incursion, ma domà con che vun di sò omen, el Knut, el vaga con l'ecupagg del Ragnar. Questa volta chì el Ragnar el se porta adree la mier Lagertha e l’incarica l’Athelstan de protesger la massaria. In del desbarcà, i vichingh a inn ricevud de trupe armade e Ragnar a l’è propens ad acetà l’oferta soa de lor de compagnai pacificament al paes. Sò fradell Rollo a l’è minga d’acordi e ‘l ne ven foeura on conflit indove che i britanich a inn vinciud.

Dificoltà[Modifega | modifica 'l sorgent]

Trama[Modifega | modifica 'l sorgent]

In vista d’on paesot, el Ragnar l’insist a specià fina al dì adree inanz de tacà, a savé che de domenega la pussee part de la sgent la sarà a messa. El pian el fonziona e ‘l Ragnar e i sò omen i ocupen e sachegen el borgh senza incontrà resistenza. El Knut el violenta ona dona e ‘l ven scovert de la Lagertha, donca el tenta de violentàlla e lee l'le mazza. Tornad a la spiagia i veden el sò pass sbarrad d’ona missolta de guerrier britannich guidad del scior Wigea. La batalia l’è bestial ma in ultim i vichingh en vegnen foeura vittorios. A Kattegat el cont Haraldson l’acusa el Ragnar de havé copad el Knut e ‘l le fa trigà per mandàll a process. In del tentà de otegnì ona condana, l’Haraldson el ghe ofriss ona sfrosada al Rollo per convincel a testimonià contra al sò fradell. Ma al process el Rollo el testimonia a favor del Ragnar e doncà el fa borlà ogni acusa. Intanta che ‘l Ragnar insema a i so compagn a inn ‘dree a fa festa, di omen je tachen assabruta. L’atach el ven ruzà indree con sucess ma in fra i mort a gh’è l’Erik, on amis del Ragnar.

L'atach[Modifega | modifica 'l sorgent]

Trama[Modifega | modifica 'l sorgent]

El cont Haraldson el taca la masseria del Ragnar per “dàgh la paga”. I sò omen i devasten la pussee part de la massaria e copen tucc quei che incontren. El Ragnar resta ferid e ‘l se rend per dàgh a la soa famija el temp de rivà a la soa barca e metes al sicur. El Ragnar el riess a tovajà via, ma i omen de l’ Haraldson a ghe corren adree, e rivad in su la cima de la filera de scoeuj, nó ‘l gh’ha altra scerna che borlà in mar. Per fortuna, l’è vist e salvad a temp de l’ Althestan. Al’è menad in del Floki che ‘l ghe forniss i prime cure. Intratanta el Rollo el ghe dis a l’Haraldson che ‘l Ragnar el gh'havariss de vesser mort. La Siggy l’ avisa el Rollo che ‘l marid el voeul copàll, ma l'avertiment el riva trop tard e ‘l Rollo al’è fad presoner e poeu a l'è tormentad per tentà de fàgh confessà il loeugh indove che ‘l Ragnar al’era scondud. Quand che ‘l Ragnar el ven a savé del Torstein quell che gh’è succedud al Rollo, el manda ‘l Floki ‘me nonzi e ‘l sfida a duell l’Haraldson. Intrantanta l’Haraldson l’ha organizzad on matrimoni per la fioeula Thyri con el vegg cont Bjarni, senza interpellà né la mier Siggy né soa fioeula.

Sepoltura[Modifega | modifica 'l sorgent]

Trama[Modifega | modifica 'l sorgent]

Al principi, el cont Haraldson, a fà memoria di parolle de l'indovin, el refuda la sfida del Ragnar, ma poeu el cambia idea e l’aceta la sfida. Siben che la Lagertha la gh’habia pagura che ‘l Ragnar el sia an’mò trop debol, lù el ven foeura trionfant del combatiment de poeu de havé copad el cont Haraldson e ‘l diventa el noeuv cont. La Siggy la ne profita del casot per liberà la fioeula de quell matrimoni là minga volsud e la mazza el cont Bjarni de Svealand. El Rollo el toeu su la sodisfazzion de copà el Svein, el consijer de l’Haraldson. El Ragnar el ghe conced a l’Haraldson on funeral degn del sò rango, ma el sacrifizzi d’ona s’ciava che l’aceta volontariament de andàgh adree el vegg cont in de la mort, el sconvolg l’Athelstan. Al’è on longh inverna fregg, e la Lagertha la restà an’mò gravida e la Siggy aceta la protezzion del Rollo che ‘l ghe ofriss de maridàlla. Al rivà de la primavera tri bastiment vichingh i a riven in Inghilterra e i vann inanz adree al fium Tyne. Intanta el rè Aelle, quand che 'l ven a savé del rivà di vichingh, el se prepara a batajà e ‘l fa copà el scior Wigea per el sò poch coragg, cont el butàll in d’on fopa con di serpent.

El riscat d'on rè[Modifega | modifica 'l sorgent]

Trama[Modifega | modifica 'l sorgent]

Desbarcad a terra, el Ragnar e i sò omen i tiren in pee on acampament fortificad. Intanta el Rè Aelle el ricev sò fradell Lord Aethelwulf che 'l riva coi sò trupe. Ma l’Aethelwulf e la soa armada a inn vincud a la svelta quand che ‘l Ragnar el taca el sò acampment de nocc. El Ragnar l’aceta l'invid a on randevó col Rè Aelle per cercà on acord. El Ragnar el domanda 2000 lirasce de or e arsgent 'me riscat per el fradell del ré e per lassà i so terre. El rè l’aceta con che vun di omen del Ragnar el vegna batezad. El Rollo el se ofriss 'me volontari e ‘l ricev el batesim e quell fatto chì el ghe fa vegnì el fonsg al Floki. El rè, però, el gh’ha nissuna intenzion de pagà el riscat e lancia on atach al camp viching, ma l'attach al’è ruzad indree con bestialità. Per vendeta el Ragnar el ghe invia el corp senza vita de sò fradell al Rè, e Aelle el ven obligad a consegnàgh al Ragnar i daner. Ma in del vardà i bastiment del Ragnar a lassà i sò terre, el Rè Aelle el ghe deciara ciar e net al Ragnar e ai sò omen el sò odi senza fin e ‘l giura che ‘l se darà pù pas fina a quand che ‘l se sarà nan'mò vendicad. Intanta a Kattegat, la Lagertha in mancanza del cont Ragnar, la distribuiss giustizzia con giudizzi e l’aceta anca l'oferta de la Siggy di diventà soa serva. Purtrop Lagertha la gh’ha ona dispersa spontanea; la sarà confortada del Ragnar, che ‘l ghe farà capì a lee che ‘l ghe voeul an’mò ben.

Sacrifizzi[Modifega | modifica 'l sorgent]

Trama[Modifega | modifica 'l sorgent]

El Ragnar, la soa famija e i alter viagen a Uppsala per rendegh omagg ai dei. A l’è on viagg che i fann ogni ann noeuv e lù l’invida Athelstan a compagnài. L’Athelstan el ven in cognizzion che a ghe sarann di sacrifizzi uman e animai. El Rè Horik l’aceta el Ragnar che ‘l ghe giura fedeltà e ‘l se met al sò servizzi. El Ragnar el ghe domanda a l’Horik de sgiontà insema a lù i sò forze, in manera de podé mandà a ovest di grup de incursor pussee grand. Horik l’aceta ma el gh’ha on compit per lù e ‘l le manda in del Jarl Borg ‘me emissari per reclamà la restituizzion de certe terre che ‘l Borg adess el controlla. El dì di sacrifizzi al’è precedud d'on period de festegiament indove che tucc i vann in sciambola. L’Athelstan el dis ciar e net che l’ha rinunzia a la soa fed cristiana, ma ‘l ven in cognizzion de vesser lilinscì per vesser sacrificad. Per fortuna per lù, el sacerdot ‘l le pensa minga adat al sacrifizzi perché pensa che lù in realtà, l’habia nananmò rinonziad al cristianesim. L’è stad inscì che ‘l grup del Ragnar el gh’ha de fornì on sostitut e Leif, vun di omen del Ragnar, el se ofriss ‘me volontari e l’è sacrificad per man del rè Horik insema di alter vot omen e noeuv animai d’ogni spece.

Cambia tut[Modifega | modifica 'l sorgent]

Trama[Modifega | modifica 'l sorgent]

Su richiesta del rè Horik, el Ragnar insema a sò fradell Rollo, sò fioeul Bjorn e Floki a viagen vers el jarldom de Götland per negozzià i terre questonade cont el jarl Borg. Adree a spetà la risposta del rè Horik a la controproposta del Borg, el Ragnar l’incontra la belòla principessa Aslaug e lor du i gh’hann on raport sessual. El tradiment de sò pader vers soa mader el trà foeura di strasc el Bjorn, che l’avertiss su el Ragnar e 'l minacia de cuntàgh su tusscoss a la Lagertha. A cà, la Lagertha l’ha fad di strani sogn e per via de la sua pagura per el Ragnar l’interpella l’induvin che ‘l ghe dis a lee che 'l Ragnar l’è nò in pericol per la soa vita, ma per el mond magich. Ragnar l’incontra an’mò l’Aslaug che la ghe dis che l’è ‘dree a spetà on fioeul. Intanta on'epidemia contagiosa la ciapa Kattegat e la ranza ona fota de vitime infra i quai la fioeula del Ragnar e la Lagertha, la Gyda, e la fioeula de la Siggy, Thyri. El Floki el torna de noeuv del jarl Borg con la risposta del re Horik che purtrop l’è negativa. El rè l’ha refudà la proposta del Borg e quest el significa che ‘l custionament el sarà afidad ai armi e che ben prest i dò armade i combatarann. Ruzad de l’ambizzion e de l'invidia, el Rollo el se lassa convincer del jarl Borg a combater insema a lù contra al sò fradell Ragnar.

Note[Modifega | modifica 'l sorgent]

  1. ↑ (EN) SHOWS A-Z Vikings on History. The Futon Critic. URL consultad in data 24 febbraio 2013.
  2. ↑ Sara Bibel. (EN) Sunday Cable Ratings: 'The Walking Dead' Wins Night, 'The Bible, 'Vikings', 'Shameless', 'Real Housewives of Atlanta', 'Pawn Stars' & More. TV by the Numbers, 5 marzo 2013. URL consultad in data 5 marzo 2013. (arqiviad de l'url orijenal in data 27 giugno 2015)
  3. ↑ Amanda Kondolojy. (EN) Sunday Cable Ratings: 'The Walking Dead' Wins Night + 'The Bible', 'Vikings', 'Real Housewives of Atlanta', 'The Client List' & More. TV by the Numbers, 12 marzo 2013. URL consultad in data 13 marzo 2013. (arqiviad de l'url orijenal in data 14 marzo 2013)
  4. ↑ Sara Bibel. (EN) Sunday Cable Ratings: 'The Walking Dead' Wins Night, 'The Bible', 'Vikings', 'The Client List', 'Shameless', 'Army Wives' & More. TV by the Numbers, 19 marzo 2013. URL consultad in data 19 marzo 2013. (arqiviad de l'url orijenal in data 6 aprile 2013)
  5. ↑ Amanda Kondolojy. (EN) Sunday Cable Ratings: 'The Walking Dead' Wins Night + 'The Bible', 'Talking Dead', NCAA Basketball, 'Vikings' & More. TV by the Numbers, 26 marzo 2013. URL consultad in data 26 marzo 2013. (arqiviad de l'url orijenal in data 6 aprile 2013)
  6. ↑ Sara Bibel. (EN) Sunday Cable Ratings: 'The Walking Dead' Wins Night, 'Game of Thrones', 'The Bible', 'Vikings', 'Shameless', 'The Client List' & More. TV by the Numbers, 2 aprile 2013. URL consultad in data 2 aprile 2013. (arqiviad de l'url orijenal in data 1 settembre 2016)
  7. ↑ Amanda Kondolojy. (EN) Sunday Cable Ratings: 'Game of Thrones' Wins Night + 'Real Housewives of Atlanta', 'Kourtney & Kim Take Miami', 'Vikings', 'Mad Men' & More. TV by the Numbers, 9 aprile 2013. URL consultad in data 9 aprile 2013. (arqiviad de l'url orijenal in data 1 settembre 2016)
  8. ↑ Sara Bibel. (EN) Sunday Cable Ratings: 'Game of Thrones' Wins Night, 'MTV Movie Awards', 'Vikings', 'Mad Men','The Client List', 'Veep' & More. TV by the Numbers, 16 aprile 2013. URL consultad in data 16 aprile 2013. (arqiviad de l'url orijenal in data 1 settembre 2016)
  9. ↑ Amanda Kondolojy. (EN) Sunday Cable Ratings: 'Game of Thrones' Wins Night + NBA Playoffs, 'Real Housewives of Atlanta', 'Vikings' & More. TV by the Numbers, 23 aprile 2013. URL consultad in data 23 aprile 2013. (arqiviad de l'url orijenal in data 1 settembre 2016)
  10. ↑ Sara Bibel. (EN) Sunday Cable Ratings: 'Game of Thrones' Wins Night, NBA Playoffs, 'Vikings', 'The Client List', 'Mad Men', 'Veep' & Mor. TV by the Numbers, 30 aprile 2013. URL consultad in data 30 aprile 2013. (arqiviad de l'url orijenal in data 1 settembre 2016)
Utegnüü da "https://lmo.wikipedia.org/w/index.php?title=Episodi_de_Vikings_(prima_stasgion)&oldid=1250558"