Cusan (MI)

Cusan (Cusano Milanino in Italian; Cusanum ò Cuxanum in Latin) l'è on comun de la Provincia de Milan con 18 886 abitant, situaa a nòrd del capploeugh.

Stòria

La stòria de Cusan la scomincia in del 336, ann in del qual hinn rivaa in quij territòri chì di giudes mandaa de l'imperador Giovian: l'hann ciappaa ben prest el nòmm de Capuani, vist che vegniven de Capua. Spedii per funzion amministrativ, hann ottegnuu ben prest el titol de comites. Intorna al 1000, el poder el saria passaa a la famiglia di Cusan, a la qual quella precedent la gh'aveva daa i pròppi ben. Duranta el period spagnoeu, Cusan l'è staa legaa al feud de Des, del qual l'ha condividuu i sòrt fina al 1657, quand che l'è staa separaa e donaa a la famiglia Omodei. El palazz Omodei l'òspita i fresch di ann 1654-1655 dipingiuu del Carpoforo Tencalla.

In di primm ann del Vòttcent el comun - reggiuu de deputaa, di quai vun l'era el president, l'era giamò molto efficent e 'l gh'aveva on archivi: i sò primm att hinn del 1816. In del 1860 l'è staa istituii el Consili Comunal e l'è staa nominaa el primm sindich. Duu ann pussee tarda, Cusan l'è staa ciamaa in Italian Cusano sul Seveso e in del 1869 gh'hinn staa taccaa Corman e Brusuj, union finida giamò l'ann dòpo. A partì del 1915 el comun el gh'ha el nòmm de adess, per recognoss el noeuv quarter, faa 'me città-giardin, de Milanin.

A Cusan gh'è nassuu l'allenador Giovanni Trapattoni (1939).