Consej Lombard per la Lengua

Quest articol chì l'è scrivuu in lombard, grafia milanesa.

El Consej Lombard per la Lengua (breviaa cont CLL, in de la so grafia Consêj Lumbaart për la Lengua) a l'è staa vun di primm sociazion in favor de la lengua lombarda, fondada in di agn '90. L'ha daa origin a voeuna di primm propost de grafia unitaria per el lombard.

Storia

Fondaa in di agn '90 el fa la soa prima proposta de grafia in del 1997. El sò sitt a l'è pu giornaa del 1998.

In del 2000 el sò principal esponent Giorgg Bosoni el presenta el sò manual, che l'è publegaa in del 2003. In del 2007 el Claudi Meneghin el fa 'na noeuva proposta per tutt l'arch padan che la doperaria la forma "-es" per el plural femminin.

Proposta ortografega

La proposta ortografega del CLL a l'era fonetega, ciovè la voreva reppresentà i dialett in la manera che se parnonzien, a differenza, per esempi, de la milanesa che la gh'ha di element de compromess o de la Scriver Lombard che l'è polinomega.

La dopera i dobbi vocaj per segnà la longhezza vocalega, el dopera la "f" per el segn "v" dur a fin de parolla menter 'l mett minga se l'è asonora in la parolla (esempi: noeuv, nööf - loeuva, lööa) e la dopera minga i vocaj dur a fin parolla (esempi "did", perché se dis "didin" e "didun")

Tabella vocalega

• à = a curta e verta: Gàt, Ràt, Sàch (grafia classega = gatt, ratt, sacch, grafia ünificada = gat, rat, sach)
• á = a longa e sarada: Parláda, Sganbáda, Stracáda (grafia classega = parlada, sgambada, straccada)
• áa = a sarada longa: Páas, Andáa, Parláa (grafia classega = pas, andaa, parlaa)
• ü = ü curta e verta: Tüc', Süc', Lüm (grafia classega = tucc, succ, lumm)
• üü = ü longa e sarada: Lüüs, Vendüü, Müür (grafia classega = lus, venduu, mur)
• ö = ö curta e verta: Incö, Böc', Pö (grafia classega = incoeu, boeugg, poeu)
• öö = ö longa e sarada: Rööda, Vööj, Fööja (grafia classega = roeuda, voeuj, foeuja)
• ë = vocal atona ciamada schwa, parnonziada a segonda del dialett : Përchè, Trinchël, Sempër (grafia classega = perchè, trinchel, semper)

Logo

El logo a l'era ispiraa a la bandera istorega de Lombardia, che 'l deriva de la Cros de San Giorgg i letter CLL.

Riferiment

• El sò sitt in su l'archive.org
• Rebuilding the Rhaeto-Cisalpine written language: Guidelines and criteria. Part I: ORS-Orthography (pdf)
• Bsav n. 6/2003 Arqiviad qé: [1] (pdf Arqiviad qé: [2] )