Cavra orobega

Quest articol chì l'è scrivud in lombard, con la Noeuva Ortografia Lombarda

La cavra orobega, anca ciamada Vallsgeroeula, a l'è ona razza de cavra lombarda.

A l'è vuna di vot razze de cavra per i che l'Associazione Nazionale della Pastorizia (Sociazzion Nazzional de la Pastorizzia) la tegn un register, e al 2013 gh'eren 1109 de 'ste cavre.

Origen

L’origen de la razza Orobega la se conoss nò. Segon quaivoeuna testimonianza oral la vegnaria de la fusion de caver rivad cont i carboner meridionai e caver de la Vall Sgeroeula. Segon alter l’è ona popolazzion nativa cont di somijanze cont l’Alpina comun^[2].

On rosc de caver cont carateristiche de l’Orobega d’incoeu el se pò reconosser in d’ona stampa popolar del secol quell di desnoeuv intanta che’l va dent in Milan da Porta Oriental (incoeu Porta Venezia). In di fotografie de caver de la Valsasna de la prima mità del secol se noten minga animai che se poden considerà come razza Orobega, che l’éra minga ancamò rivad in de la vall^[2].

Descrizzion fisica

Mantell

El mantell l’è caraterizad d’ona longhezza importanta di pii su tut el corp, anca se el pil pussee longh el se troeuva in de la zona de la gropa e di garoni^[2]. Gh’enn varietà de mantell divers e i forme mes'ciade i enn minga rare^[1]^[2]:

Farinet: mantell gris, marron ciar con o senza rifless come de vioeula, bianch panera;
Marin: mantell smagiad tipich de la razza, principalment negher putost che gris de dree e bianch panera denanz; el coo el gh’ha dò strisce lateral de color negher o gris;
Nigru: negher e rossaster;
Camosch: mantell scur cont i pii mes’ciad bianch, negher e ross in de le vari tonalità.

Coo e coll

El coo gh’ha di ban proporzzion, minga pesant, in sgeneral fina; la barba, sossen longa in di mas’c, la se troeuva de spess anca in di femine. I oregie, minga sossen longhe, hinn drite e portad diagonali in inanz, mai pendent. I corna, sossenn importan in del mas’c e longhe anca in di femine, hinn spiatarad e on zinch torsgud. I animai senza corna hinn rari e a se lassen correr domà se hinn femine^[2].

El coll l’è d’ona longhezza media e sutil; el pò havégh i pendellin come nò^[2].

Corp e art

L'orobega a l'è ona razza de taja media, cont on corp ben desvilupad e i art fort. El coll l'è mediament longh e sutil e el pò havégh i pendellin come nò^[2].

El sistema di tete l’è svilupad, tacad ben, de forma tonda putost che de per. I borit hinn de norma gross e conich^[2].


Dimension^[2]
	Mas'c	Femine
Altezza a la crosera (cm)	79	73
Pes (kg)	80	65

Prodot tipich

I prodot tipich ligad a la razza hinn: ona varietà de Bit ciamad Bit storich, anca conossud come Storich rebell putost che Bit Dop “Val del Bit”; la mascherpa; el formagìn de la Valsasna; el matuscin; Roviola de la Val Brembana; i salam, tra i quai gh’è el violin^[1]^[2].

Manifestazzion

A Casargh, in del mes de november, ghe vegn organizad la Mostra regional de la Cavra orobega, indove i se trann insema tancc alevator de la razza. In del cors de la fera, i caver enn valutade e premiade in varie categorie.

Ligam de foeura

Not

↑ ^1,0 ^1,1 ^1,2 https://razzelombarde.ibba.cnr.it/capra-orobica-valgerola/#:~:text=La%20capra%20Orobica%20%C3%A8%20presente,allevamento%20di%20bovini%20da%20latte.
↑ ^2,00 ^2,01 ^2,02 ^2,03 ^2,04 ^2,05 ^2,06 ^2,07 ^2,08 ^2,09 Daniele Bigi e Alessio Zanon, Atlante delle razze autoctone: bovini, equini, ovicaprini, suini allevati in Italia. Ediz. Illustrata, Edagricole, 2008, pp. 379-381.

Alter proget

Wikimedia Commons el gh'ha dent imagin o alter archivi su Cavra orobega

[:0-1] 1,0 ^1,1 ^1,2 https://razzelombarde.ibba.cnr.it/capra-orobica-valgerola/#:~:text=La%20capra%20Orobica%20%C3%A8%20presente,allevamento%20di%20bovini%20da%20latte.

[:1-2] 2,00 ^2,01 ^2,02 ^2,03 ^2,04 ^2,05 ^2,06 ^2,07 ^2,08 ^2,09 Daniele Bigi e Alessio Zanon, Atlante delle razze autoctone: bovini, equini, ovicaprini, suini allevati in Italia. Ediz. Illustrata, Edagricole, 2008, pp. 379-381.

[1]

[2]