Bibliotega vescontee sforzesca

Quest articol chì l'è scrivud in lombard, con la Noeuva Ortografia Lombarda

La Bibliotega vescontee-sforzesca a l'era la bibliotega privada di sciori e duca de Milan de la família Vescont prima e Sforza poeu, che la se troeuvava dent al Castell Vescontee de Pavia, ma l'è stada menada in Franza del Luis XII.

L'ispirazzion ghe saria vegnuda al Giovann II e al Galeazz II per la visita del Petrarca, e sgiamò del 1378 la gh'haveva de vesser ben granda, tant che l'è visitada del Geoffrey Chaucer, in visita diplomatega a la cort del Galeazz e del Bernabò. El sarà comunque el Gian Galeazz a fàlla sciora sciorenta, a ciapà vari scrit di so parent e de sgent borlada in desgrazzia, tant 'me el Pasquin Capell, oltra ai botin de guerra.

Intorna a la mità del '400, per el Vespasian de Bisticci, a l'era vuna di biblioteghe pussee sciore de l'Europa, insema a la Libreria Laurenziana, a la bibliotega apostolega vaticana e a quella de l'Università de Oxford. El Lodovigh el Mor la slarga ancamò pussee, per esempi cont i volum de medesina del Sforza Segond Sforza, e ghe dis al Tristan Calch de ordenàlla ancamò: el sgiontarà anca i volum ciapad del Cich Simoneta, quei rivad de la Badia de San Colomban e 'l farà voltà in latin i oeuvere in ebraich del Salomon, che 'l podarà viver in del Castell.

Quand che 'l borla sgiò el governo di Sforza i franzes menen circa 400 volum a Blois, menter di alter inn stad perdud o inn guarnad in alter biblioteghe. Al dì d'incoeu i musee civegh de Pavia inn dree a fà una recostruzzion multimediala di test, che l'è ospitada in del Castell.