Wikipedia:Parlóm en pó de nóter/lüi 2009

De Wikipedia

Ol lombàrd (ach Lombard, Lombart, Lumbart) (còdice ISO 639-3 lmo) l' è öna lèngua che la fà part de la famèa Galo-italica (o per èss piö precìs Galo-Rumanza-Cisalpena), öna famèa che la furma ü sistema linguìstech diferènt tat del Italià che del Reto-Romàns. La lèngua lombarda l'è parlada suratöt in de la Svíssera meridiunala (Ticino e i Grisù), in de l'Italia setentriunala (buna part de la Lombardéa e öna quach àrea di regiù tacade, suratöt en del Piemont oriental), ma apò 'n d'ü pér de paisì de la Sicilia (dialècc Galo-Sicilià). Apò a se l'Italià l'è de sólet dovràt come lèngua scricia 'n di pòscc 'ndó che se parla 'l lombàrd, chèsto l'è mia mutualmènt comprensibel co l'Italià e chèste dò lèngue i fa part de du ram diferèncc de la pianta de la famèa linguistéga romanza.

Ol lombard l'è stat censit de l'UNESCO come lèngua 'n perìcol d'estinsiù e de conseguènsa la resülta 'na lèngua de tutelà. I sò dò variancc principai i è chèla ocidentàla (o insübrica) e chèla orientàla, dò variancc che le g'ha 'n bèl pó de diferènse, tat che gh'è 'na quach lenguésta che 'l i a cunsìdera dò lèngue separàde. Ol Stato Italià 'l reconóss mìa i parlàncc de la lèngua lombarda compàgn de 'na minorànsa lenguìstega. (in nacc)