Wang LOCI-2
|
Quest articol chì l'è scrivud in lombard, con la Noeuva Ortografia Lombarda |
El Wang LOCI-2 (logarithmic calculating instrument, cioè Strument de calcol logaritmegh) a l'è stad un calcolator de tavol fad di Wang Laboratories in del 1965, per sostituì el Wang LOCI-1.
Storia[Modifega | modifica 'l sorgent]
L'è stada lanziada in del sginer del 1965 per sostituì el LOCI-1, sortid domà un quaj mes prima e minga programabel, e progetada de l'An Wang, che l'haveva fad la soa tesi a Harvard e donca el cognosseva ben la strutura di calcolator doperad lilinscì. A l'era venduda per pussee de 6'000$, sbassad poeu a 4'750$.
In del 1966 l'è fiancad de la Wang 300, che la costava men e in version bas la gh'haveva men de fonzion e la somejava pussee a 'na calcolatris che un calcolator, e l'è poeu anca fiancad del Wang 2315, una version conligada a 'na telescriventa.
Fonzionament[Modifega | modifica 'l sorgent]
El sistema el doperava 'na classega architetura Harvard, con division total in tra la memoria de programa e quella dacc. La memoria de programa a l'era una Read Only Memory in su scheda perforada, menter la memoria dacc a l'era in l'eletronega de la machina. El programa el podeva vesser de 80 pass, che podeven volzàss a 160 cont un letor de schede pussee, menter la memoria dacc la gh'haveva quater, ma podeven vesser anca sedes in di version pussee costose, register de 10 cifer, che podeven vesser volzade a 16 cont un sgiornament de l'hardware.
El podeva fà i operazzion aritmeteghe, salt, test di condizzion, moviment in tra register, logaritm e antilogaritm. A l'era mia possibel doperà diretament di operazzion logeghe e de shift in sui register, ma per podéll doperà besognava havégh una quaj cognossenza tecnega, desgià che di fonzion se controllaven in binari.