Wah Chang

Quest articol chì l'è scrivud in lombard, con la Noeuva Ortografia Lombarda

El Wah Ming Chang

El Wah Ming Chang (Honolulu, 2 de agost del 1917 - Carmel-by-the-Sea, 22 de desember del 2003) l’è stad on desainer e artista statunitens, assosenn conossud soratut per i so modellit drovad in de la serie original de Star Trek.

Biografia

L’è nassud a Honolulu (Hawaii) el 2 de agost del 1917, del Dai Song e la Fai Sue Chang. Set ann pussee tard la sua famija la s’è trasferida a San Francisco. In tra la fin di ann '30 e ‘l principi di ann '40 l’ha tacad a lavorà a la Disney, indove che l’ha fad di plastegh e modellit d’ona fota de film, (in fra i quai Pinocchio e Bambi). In del 1941 a gh’è stada diagnosticada la poliomielite; de poeu de on longh ricover in de l’ospedal Twin Oaks Sanitarium de San Gabriell (California) e diversi tratament medegh (in fra i quai el confinament in del polmon d'azzal) a la fin l’è tornad a caminà, ma per il rest de la soa vita el gh’ha avud di seri problema polmonar. In seguit l’ha lavorad ‘me desainer d’on mucc de serie de fantascenza, in fra i quai The Outer Limits , Star Trek, e in tanti film de Hollywood, in fra i quai Il pianeta delle scimmie (‘’el pianeta di scimbie’’).

In seguit el s’è metud adree a scolpì di modei de animai selvadigh a Carmel-by-the-Sea, in California, indove che l’è mort el 22 de desember 2003.

Lavorà

Desain di oget de Star Trek

Il comunicator futuristico di Wah Chang

El Wah Chang l’ha concepid tanti oget de la serie classica de Star Trek, inclus el tricorder e ‘l comunicator. Di volte a ghe ven per error acreditada anca la creazzion del phaser che in realtà l’è stad concepid del diretor artistich de la serie, el Matt Jefferies. De tute i manere el phaser de Jefferies l’è stad minga acetad, conca el Chang a l’ha ridissegnad per lù. Per Star Trek, el Chang l’ha idead i costum del "vampiro de sal" de l'episodi Trappola umana, quell del Gorn (episodi Arena) e la falsa imagin del Balok (espisodi L'espediente della carbonite o ben ‘’el truch de la carbonite’’). L’ha cread i triboi (di animai pelos tipich de Strar Trek, in de l'episodi Animaletti pericolosi o ben ‘’Animalet pericolos’’) cont el drovà di pellizze sintetiche piene de s’ciuma, el Neanderthal de l’episodi La Galileo, la nav de guerra romulana de l’episodi La navicella invisibile (‘’la navisella invisibel’’), l'arpa vulcaniana (vista prima de tut in de l’episodi Il naufrago delle stelle (‘’Quell che l’ha fad naufragi in fra i stelle”) e in seguit in La magnificenza del Re, Il duello (‘’el duell’’) e Viaggio verso Eden(‘’Viagg vers l’Eden’’)). El comunicator di Star Trek concepid del Chang l’è considerad de tanti ‘me la prima sorgent de ispirazzion in del fà su i telefoni cellular con lo sportellin.

Lavora in del cinema e in alter serie

In quant ai so lavorà in del cinema l’è ricordad per havé fad el plastich de Pinocchio che l’è stad drovad di animador de la Walt Disney, e per i modellit di cerv drovad in Bambi.. L’ha dissegnad anca el baret che l' Elizabeth Taylor la gh’ha su in del film Cleopatra. El so lavorà pussee important probabilment l’è stad quell per el film del 1960 L'uomo che visse nel futuro (“L’om che l’ha vissud in del temp che ‘l gh’ha de vegnì”), per el qual la socetà di Chang, la Project Unlimited, Inc., l’ha vinciud el Premio Oscar per i efet speciai. De tute i manere a causa de la manera che i credit de l’opera a inn stad presentad per concorrer a l'Academy el Chang formalment l’è andad minga dent in de la lista di vincitor. El storich cinematografich Bob Burns l’ha riferid che ‘l Chang el s’è minga lamentad per el quell fad lì. "A l’era la persona pussee umil, l'om pussee gentil che hoo conossud in vita mia," el Burns l’ha did. "El s’è mai vantad de nagot, e l’ha segutad a fa di mester meritevol."

In pù el Chang l’ha costruid la creadura artificial de The Architects of Fear, episodi de la serie The Outer Limits (“i limit defoeura”), on quai arred scenich per el film Il Pianeta delle Scimmie (“El pianeta di scimbie”), l’animazzion de fà scaget del schelter in del film La forza invisibile (La forza invisibil), la machina volanta in Il padrone del mondo (‘’El padron del mond’’) , e i dinossauri in La valle dei dinosauri (‘’La vall di dinossauri’’).

Documentari

El Chang l’è comparid in del documentari The Fantasy Film Worlds of George Pal del 1985, prodot e dirigiud de l’Arnold Leibovit. In pù l’è stad on ospit in del documentari Time Machine: The Journey Back del 1993, prodot e dirigiud del Clyde Lucas.

Bibliografia

• The Star Trek Sketchbook: The Original Series, Pocket Books, 1997. 9780671002190
• The Art of Star Trek, Pocket Books, 1995. 9780671898045
• Gail Blasser Riley, Wah Ming Chang: Artist and Master of Special Effects, Enslow Publishers, Inc., 1995. 978-0-89490-639-8
• The Life and Sculpture of Wah Ming Chang, Wah Ming Chang, 1989. 978-0-9625293-1-3

Vos correlade

• Star Trek
• The Outer Limits)

Ligam de foeura

• Modell:Collegamenti esterni