Via Sparano da Bari
|
Quest articol chì l'è scrivud in lombard, con la Noeuva Ortografia Lombarda |
La via Sparano da Bari a l'è un stradon del quarter Murat de Bari longh 750 meter[1], che la conliga la stazzion centrala cont el Cors Vitori Emanuell II e, in manera pussee larga con Bari Vegg.[2]
La ciapa el nom del giurista angioin Sparan de Bari. Se troeuven in su la via el Palazzi Mincuzzi, vun di esempi pussee important de stil liberty de la cità, e la Gesa de San Ferdinand.[2] Al dì d'incoeu a l'è una strada reservada ai pedon, cont anca i spiciole e i monopatin eletrigh che poden andàgh no, e gh'è di traversament per el trafegh fad inscì de fà andà pian i veicoi.[1]
Storia e carateristeghe
[Modifega | modifica 'l sorgent]El vialon l'è stad fad su in del desvilup del noeuv quarter Murat, part de l'espansion de la cità voluda del monarca frances, e in del 1833 ghe dann el nom del Sparan.[1] In del 1910 ghe derven la linia del tram che la conligava la stazzion centrala al Port e a la stazzion de la tranvia Bari-Barletta, che l'è sarrada in del 1948 cont i binari che inn tolt via, e l'è verta al trafegh stradal.[1] Inscì la resta fina al 1973, quand che se scerniss de pedonalizàlla, cont el meter de piante e fior, che inn tolt via in del 2018, quand che inn mitud di "salot" a tema con di panchine e di aredament ligad a quell tema li: gh'è, a partì de la stazzion, quell de la musega, quell del giardin, quell literari, quell liberty, quell del cult, quell de la moda e, infin, quell de Porta Veggia, inscì ciamad perchè el mena a la cità veggia.[1] 'Sti salot chi, che inn ispirad a di carateristeghe o di negozzi vegg che gh'eren, inn vun per ogni isolad de la via.[3]
Per tut el temp del regim fascista la s'è ciamada via Vittorio Veneto, in regord de la bataja de la prima guerra mondial.[1]
Riferiment
[Modifega | modifica 'l sorgent]- ↑ 1,0 1,1 1,2 1,3 1,4 1,5 Le storie, i negozi e i palazzi di via Sparano: strada di Bari in perenne trasformazione.
- ↑ 2,0 2,1 Vie d'Italia, così sta cambiando via Sparano: da 'salotto buono di Bari' a spazio aperto per fast food e pizzerie.
- ↑ L’eleganza di una delle strade più caratteristiche del centro di Bari: scopri i salotti di Via Sparano.