Union di Stat Sovran

De Wikipedia
Lumbard ucidental Quest articol chì l'è scrivuu in lombard, grafia milanesa.
In ross e naranz i Stat che han partecipaa a l'Union, in negher quej ch'han vorzuu subit l'independenza

L'Union di Stat Sovran, o anca Union di Republegh Sovietegh Sovran, l'è staa on progett de revision de l'URSS insubii dal president Mikhail Gorbaciov per trasformà la federazion in d'ona confederazion e donca fermà la fin de l'URSS. Dopo del Putsch de Agost el progett l'è staa mia implementaa e i sò principi hinn staa ciappaa in la Comunità di Stat Independent, ma comé organizzazion regionala e mia confederazion.

Desvilupp[Modifega | modifica 'l sorgent]

El noeuv trattaa l'avaria sostituii el Trattaa de formazion de l'URSS del 1922 e donca trasformaa l'Union di Republegh Socialist Soviedegh in l'Union di Stat Sovran e l'era el tentativ final del Gorbaciov de salvà l'Union. El 20 de agost del 1991 l'era programmada la cerimonia de firma del trattaa de la RSSF Russa, ma l'è staa blocaa dal Putsch de Agost.

Ona decentralizzazion pussee granda l'era stada insubida dal Gorbaciov in del Congress del Partii Comunista quell de 28 del 1990 e mandada al Soviet Suprem el 23 de november del 1990, che l'ha cominciaa a lavoràgh el primm de l'ann 1991. El 6 de marz la proposta l'è stada approvada e 'l trattaa mandaa in di Soviet di Republegh. Estonia, Lettonia, Lituania, Moldavia, Georgia e Armenia han partecipaa no a 'sto mestee chi per rivà direttament a l'independenza da l'URSS e di republegh autonom han domandaa de volzà el sò status e vegnì costituent de 'sto patt.

El 23 de april a Novo-Ogaryovo el vegn firmaa l'inscì ciamaa Trattaa 9+1 in tra 9 republegh e 'l governo central, e 'l faseva su ona confederazion cont in comun domà el President, i forz armaa e bona part de la politega foresta.

Ad agost 8 di noeuv republegh aveven approvaa el trattaa cont di condizion, l'Ucraina l'era restada foeura anca se i sò resident aveven scernuu in del referendum soviedegh del 17 de marz del 1991 de giontàss in l'Union sotta la Deciarazion de Sovranità de l'Ucraina.

Anca se 'l trattaa l'era desviluppaa per salvà l'Union a la fin i sò condizion han menaa i Stat pussee piscinitt a domandà l'independenza piena e 'l Colp de Stat che l'ha faa restà el Gorbaciov in la soa Dacia in Crimeja l'ha faa sbassà la popolarità de l'Union, che de facc la s'è s'ceppada el 25 de dicember cont i dimission del Gorbaciov. Vist che 'l trattaa l'è mai staa firmaa, l'è nassuda poeu la Comunità di Stat Independent.

Vos corelaa[Modifega | modifica 'l sorgent]

Riferiment[Modifega | modifica 'l sorgent]