Tradizion de cavass i scarp in del mond

Quest articol chì l'è scrivuu in lombard, grafia milanesa.

On genkan giappones, indoa se caven i scarp

In di coltur, gh'è la tradizion de cavass i scarp prima de entrà in ona cà, in on tempi o anca in di olter canton publegh.

Europa

Nazion romanz

In Pajes compagn de Portogall, Italia, Spagna e in del Belgi francofon l'è normal per on ospit tengnì su i scarp, foeura che per di situazion particolar compagn de 'n paviment de legn o di particolar necessità de nettà.

Anca in Franza a l'è assee normal, ma a l'è pussee spantegaa el dà ai òspit di paposs. In la Lombardia svizzera, per tradizion, a l'éra maleducazion entrà in di cà cont i scarp e se daven i scarferott, ma cont el rivà de pussee italian a l'è deventada 'na tradizion che l'è proppi tipega.

Nazion todesch

In la pupart de la Svizzera, in Germania e in di zon germanofen del Belgi l'è spantegada la tradizion, ma gh'hinn di variant a nivell local e anca personal, e pò cambià anca in bas al temp atmosferegh o al nivell de mesizzia.

In Austria, inveci, questa tradizion la gh'ha di radis bej fort, anca i imperador el faseven.

Nazion anglosasson

In del Regn Unii el cavàss i scarp prima de entrà a l'è 'na ròba che la pò varià assee de cà a cà e de zona a zona.

In Irlanda, inveci, a l'è 'na ròba proppi ràra.

Est Europa

In di nazion slav ('me la Russia, la Polònia e.i.v) l'è difonduda la tradizion, anca se gh'hinn di variazion da paes a paes.

Anca in Romania, che l'è minga on paes slav, gh'è questa tradizion.

Pajes nordegh

Anca in di paes nordegh gh'è questa tradizion e despess i scarp se caven anca in àlter ambient compagn di scoeur.

Asia

Giappon

Probabilment, grazie anca a la diffusion di manga e anime, el Giappon l'è el paes indova 'sta tradizion chì a l'è pussee cognosuda.

Tra l'alter, in Giappon, se caven i scarp anca in on quaj ristorant e in di scoeur, indova che se metten i Uwabaki, di papòss particolar.

Corea

In Corea l'è maleducazion entrà in ona cà cont i scarp, ma, soratutt per i vegg, anca restà a pee biott. Despess i corean gh'han di sciavatt o di paposs per i ospit.

Cina

In la pupart de la Cina a l'è normal cavàss i scarp, anca per di reson prategh, ma cont l'ocidentalizzazion di cà a l'è semper pussee spantegaa de fàll no. A differenza del Giappon e de la Corea, indova che l'è 'na tradizion istorega, gh'è staa pussee period in la storia cinesa indova che la normalità a l'éra de tegnìj su.

Mond arab

In la pupart del Mond arab a l'è normal cavàss i scarp prima de entrà in d'ona cà. Paj arab mostrà la soeula de la scarpa a l'è 'na granda offesa.

Riferiment

• (IT) Lo Scarpisfero
• (IT) L’ospite scalzo in Austria: Bon Ton o buon senso?
• (EN) No shoes at home in Finland
• (EN) “Take off your shoes, please”…?
• (IT) Coreab - Buone maniere
• (IT) BUONE ABITUDINI SE SIETE OSPITI IN COREA
• (EN) Shoes on or off inside? The Chinese haven’t always been in agreement, especially when there are chairs involved