Studio di fonologia musicale Rai di Milano

Quest articol chì l'è scrivud in lombard, con la Noeuva Ortografia Lombarda

Sintetizador del Studi de Fonologia de Milan conservad al Musee di strument musegai

El Studio di fonologia musicale Rai di Milano a l'è stad un important laboratori de sperimentazzion de musega eletronega e eletroacustega dervid a Milan in del 1955 del Luciano Berio e del Bruno Maderna, restad ativ in fina al 1983. El studi de fonologia de Milan a l'è considerad vun di tri pussee important laboratori europee de musega contemporanea insema al Studio für elektronische Musik des WDR de Colonia e al Groupe de Recherches Musicales (GRM) de Paris. El studi de Milan a l'era debon important per el nivell volt di strument e di mez tecnologegh, che eren per l'epoca propi desvilupad e a l'avanguardia anca e soratut respet ai olter studi europee.

El Studio di Fonologia Musicale a l'è segond el Berio el resultad de un inconter in tra la musega e i possibilità di noeuv mez de analisi e de tratament del son e el parpon de vesser anca una sintesi in tra i diverse esperienze di studi de Colonia e de Paris, anca grazzia a la produzzion radiotelevisiva e cinematografega.

Console audio del Studi de Milan

In tra i composidor pussee important che hann lavorad in del studi de Milan a troeuvom el Luciano Berio, el Bruno Maderna, el Luigi Nono, el John Cage, l'Henri Pousseur, el Niccolò Castiglioni, l'Aldo Clementi, el Franco Donatoni, el Giacomo Manzoni, el Camillo Togni e l'Armando Gentilucci. Hann partecipad a l'esperienza meneghina anca intelletuai e musecologh 'me el Luigi Rognoni e el Piero Santi.

Storia

El studi el nass in del sgiugn del 1955 in tra i studi de la Rai, cont el nom de Studio di Fonologia Musicale, grazzia a la ruzada del Berio e del Maderna, che voleven andà adree a l'esempi frances e a quell todesch. La proposta la riva donca del diretor di program radiofonegh Giulio Razzi e de l'ingegner Nino Castelnuovo, diretor central tecnegh radio. De sorapu la proposta l'era stada sostegnuda de du important musicologh: l'Alberto Mantelli e 'l Luigi Rognoni. A l'è el Dotor Alfredo Lietti, diretor di servizzi tecnegh, che el prosgeta, el realiza e 'l se ocupa del studi e di so strument in fina al 1962. Al prosget el ghe lavora anca el tecnegh Marino Zuccheri, che el juta i composidor in de la realizazzion di toch de musega. El Studio di Fonologia a l'inizzi a l'è minga un center de produzzion musegal, ma un ver e propi laboratori per esperiment eletroacustegh de carater sgeneral, indova che se produsen per esempi radiocomedie e radiocroneghe. Del pont de vista tecnologegh el studi de Milan a l'era inanz, per esempi, respet a quell de Colonia. Defad la produzzion di son la podeva vegnì in de l'istess moment in sgenerador de son sinusoidai, in cobia fina a un massem de noeuv. De sorapu el gh'è un sgenerador de frecass, dovrad per la sgenerazzion de "frecass colorad", el gh'è un filter analizador, gh'è di filter a banda variabel, un sgenerador de impuls, un'eco magnetega, un spazzi sonor per l'eco natural, un sgenerador de tremol, un modulator de ampiezza, un modulator ad anell, magnetofon standard e magnetofon con velocità regolabel, un regolador de velocità eletregh per scurtà o slongà un passagg sonor.

Un'esperienza anticipatoria

Vun di prim e pussee important lavorà, produt in del studi numer 7 de la Rai de Milan, a l'è Ritratto di città: una soeumeanza sonora de la cità de Milan de la matina a la nocc. El se trata del lavorà che 'l met i bas per la storia del studi meneghin. Inizziad in del 1954, un ann prima de l'efetiva fondazzion, a l'è el frut del lavorà del Bruno Maderna e del Luciano Berio per la part musegal e del Roberto Leydi per el test. El radiodrama el mes'cia la musega concreta francesa con la musega eletronega pura todesca, defad a l'è fad su de son sinusoidai produt de un sgenerador e de son 'me frecass, vos e strument musegai preparad (un pianofort). In del 1955 l'oeuvra la vegn presentada al Prix Italia 'me toch sperimental foeura concors.

In tra el '56 e 'l '59

El 8 de magg del 1956 in de la sed de Cors Sempion el studi el vegn presentad a la stampa in de l'Audizione di composizione di musica concreta e di musica elettronica. I prim lavorà produt in del Studi del Berio a inn Mutazioni (1956), Perspectives (1957) e Thema, Omaggio a Joyce (1958). Quei del Maderna inscambi inn Notturno (1956), Syntaxis (1957), Continuo (1958). In del luj del 1956 i composizzion Mutazioni e Notturno vegnen eseguide in di Ferienkurse de Darmstadt. In tra el 1957 e 'l 1959 tachen a fà visita al studi divers composidor forester. Per esempi l'André Bouchourechliev, composidor bulgar-frances, el riva a Milan in del 1957 e el produs du toch, Textes. In del 1958 el passa al Studi de Milan l'american John Cage, che 'l produs el Fontana Mix. La composidora argentina Hilda Diana, che l'aveva lavorad in del studi de Paris, la produs a Milan i Dos estudios en oposición. El composidor svedes Bengt Hambraeus el realiza in del 1959 a Milan el toch Konstellationer per orghen e musega eletronega. In de l'istess ann el svizzer André Zumbach el compon el so Étude. Semper in del 1959 el composidor belga Henri Pousseur el termina el so lavorà Rimes (Rimes pour différentes sources sonores, el titol intregh), poeu dedicad al Berio e al Maderna. El se trata de un toch che 'l met insema la musega fada de strument tradizzionai e i son eletronegh. Compost in du agn, el lavorà a l'è spartid in tre part: el toch el scomincia con l'orchestra, ma piana pian di son registrad tachen a sentìss, in fina a quatà el son di strument.

Despoeu del '59

In del 1959 el Berio el lassa la so carega de diretor del Studi de Milan, anca se 'l segutarà a lavoràgh denter. El noeuv diretor a l'è el Renzo Dall'Oglio, che 'l scriv i prim document sora 'l lavorà e i toch de musega del Studi. El 22 de sgenar del 1960, per esempi, el fa su la lista de tucc i naster che se trovaven lì. Intratant che 'l Berio el sgola in di Stat Unid, al Studi de Milan vegnen invitad de la Rai, in del 1960, dodes composidor italian e du forester. La pupart de lor la farà domà vun toch e poeu el desmetarà con la musega eletronega. In del 1960 el Niccolò Castiglioni el realiza Divertimento, una composizzion con contrapont a tre vos, che la se basa in su tri son divers: la vos de l'om, la fluta a bech e i son eletronegh (son bianch e son colorad). In de l'istess ann l'Aldo Clementi el scriv el Collage 2. El 1960 a l'è anca l'ann che 'l riva el Luigi Nono, che 'l sarà el protagonista del segond period del Studi. In quell ann chì el realiza a Milan el toch Omaggio a Emilio Vedova, el so unegh lavorà domà eletronegh.

El Berio el tornarà in del Studi meneghin per la realizazzion de Momenti in del 1960 e, l'ann despoeu, de Visage: un toch de musega eletronega con vos de Cathy Berberian. A l'è inscì che el Berio el termina la so produzzion al Studi de Fonologia de Milan. In del 1960, semper con la vos de l'atora Berbarian, el Maderna el realiza Invenzione su una voce. In del 1961 el Camillo Togni el realiza Recitativo, el Franco Donatoni el scriv el Quartetto 3 in su comision de la Radio-television italiana, el Roman Vlad el componiss el Ricercare elettronico e l'Angelo Paccagnini el scriv Sequenze e strutture, che, per lu, l'è stad domà l'inizzi de un senter longh al Studi de Milan. El 1961 a l'è anca l'ann de Serenata III del Maderna, un esempi de Tape Music con domà l'usagg de son de fluta e de marimba montad e modifegad in su naster.

In del 1962 anca el Lietti el bandona el Studi per andà a Losana. El Dall'Oglio, inscambi, el tegnarà la so carega de president infina al 1963, ann che 'l vegn trasferid a Roma, in la sed central.

Bibliografia

• Electrosound, storia ed estetica della musica elettroacustica, Giacomo Fronzi, 2013, EDT srl, Turin
• C'erano una volta nove oscillatori... Lo Studio di Fonologia della Rai di Milano nello sviluppo della Nuova Musica in Italia, Paolo Donati e Ettore Pacetti, Rai Radiotelevisione Italiana, 2002, Roma
• Musica nel laboratorio elettroacustico: Lo Studio di Fonologia di Milano e la ricerca musicale negli anni Cinquanta, Nicola Scaldaferri, Libreria Musicale Italiana

Ligam de foeura

• Studio di fonologia musicale della Rai di Milano, a cura de l'Università degli Studi di Milano