Stria
|
Quest articol chì l'è scrivud in lombard, con la Noeuva Ortografia Lombarda |
Una stria l’è una fomna che la pratega la magia nigra o la striaria, o indeperlee o ind un grup ciamad “congrega”, o, nomà de rezzent, anca coma preteganta di religion moderne compagne de la Wicca.[1] A l’è donca una maga che la prœuva a influenzà el mond che la gh’ha intoren cont i sò striozz, instriadure e cognossenza oculta.[2] Ind el folclor e ind i favole, inscambi, a l’è una figura con di fatezze femenine – de solit de veggia – che ghe ven tributad di podé soranaturai che la dœuvra per nœuser a la sgent.[3]
Famosa fiss a l’è la “cascia ai strie”, fenomen medieval ind el qual la Gesa catolega l’ha tacad a brusà su i fomen che es credeva che prategaven la magia. L’ideja che gh’haveven ind el sarràj adree e condannàj a mort l’era che i podé sò de lore rivaven sgiò de un quaj acordi cont el diavol.[3] Di vœulte, ind i tradizzion cristiane, es pensava ancasì che i sò podé vegniven de di spiret cativ, e che lore je eserziven intravers di bes’ce inspiritade ciamade “famej” – depess di gat nigher, dei orloch o di scorbat. Independentement de la reson dedree di sò podé e de la manera che doperen per controllàj, i strie inn sovenz retegnude coma la causa de un frach de disaster, compagn di malagn, la desfortuna o infinamai la mort.[2]
La mitologia greco-latina l’insubiss un’imasgen spezzifega de la stria – in quell cas chì, una dona sgiovena – representada de la cobia composuda de la Zirze, che l’haveva instriad su l’ecupasg de l’Odisee cont el voltàj tucc in de di porscei, e de la Medeja, considerada una granda cognossidora de la magia de la deja Ecate. In Lombardia, vuna di presonte strie pussee famose l’è staita l’ocultista bressana Semiramide Gazzo Ghidoni,[4] font de inspirazzion per la canzon Semiramide del Charlie Cinelli.
L’equivalent mascolin di strie inn i strion.
Referenze
[Modifega | modifica 'l sorgent]Ligam de denter
[Modifega | modifica 'l sorgent]Ligam de fœura
[Modifega | modifica 'l sorgent]
Wikiquote el gh'ha dent citazzion de o su stria
Wikimedia Commons el gh'ha dent imagin o alter archivi su stria
