Spirit (rover)

De Wikipedia

Chest artícol a l'è scricc in Lumbàrt, ortograféa orientàl unificàda.


Spirit, MER-A (Mars Exploration Rover – A), l'è 'n rover (cioè 'n veìcol progetàt per müìs e esplorà la superfìce de 'n còrp celèst) che gh'è stat mandàt söl pianéta Marte per mà de la NASA endel 2003, endel quàder del progràma Mars Exploration Rover gestìt del Jet Propulsion Laboratory. La g'ha tocàt el söl de Marte ai 4 de zenér del 2004 endena zòna cunsìda come cratér de Gusev, tré setemàne prìma de la sónda sò zemèla, Opportunity (MER-B), che 'nvéce l'è ateràda sö l'ótra fàcia del pianéta. El sò nòm l'è stat sernìt per mès de 'n concórs 'ntra stüdèncc organizàt de la NASA.

L'obietìf del rover Spirit l'è de fornéser dàti per stüdià la geologìa de la superfìce de Marte. El veìcol l'è stat concepìt per ìga 'na vìta ütil de 90 dé marsià e percórer 'na distànsa de 600 méter. De piö de sich àgn dòpo éser riàt sö Marte, ai 17 de mars del 2009, el Spirit el gh'ìa envéce percurìt presapóch 7,7 km. A le fì del 2009 el s'è 'nsabiàt endèna düna e la sò öltema cumunicasiù co la Tèra l'è stàda risiìda ai 22 de mars del 2010.