Opportunity

De Wikipedia

Chest artícol a l'è scricc in Lumbàrt, ortograféa orientàl unificàda.


Opportunity, MER-B (Mars Exploration Rover – B), l'è 'l segónt de du rover (cioè dei veìcoi progetàcc per müìs e esplorà la superfìce de 'n còrp celèst) che gh'è stat mandàt söl pianéta Marte per mà de la NASA endel 2003, endel quàder del progràma Mars Exploration Rover. La g'ha tocàt el söl de Marte ai 25 de zenér del 2004 endela regiù equatoriàla cunusìda col nòm de Terra Meridiani, tré setemàne dòpo de la sónda sò zemèla, Spirit (MER-A), che 'nvéce l'è ateràda sö l'ótra fàcia del pianéta.


L'obietìf del rover Oportunity l'è de fornéser dàti per stüdià la geologìa de la superfìce de Marte. El veìcol l'ìa stat concepìt per ìga 'na vìta ütil de 90 dé marsià e percórer 'na distànsa de 600 méter, envéce endel istàt del 2015, ondes agn dòpo éser riàt so Marte, l'è amò operatìf e 'l g'ha percurìt presapóch 42 km en de pio de 4000 dé marsià.

Endela sò misiù l'Opportunity el g'ha scuprìt el prìm meteutìt sönden óter pianéta (Heat Shield Rock, Meridiani Planum) e 'l g'ha esploràt el cratér Victoria, e 'l g'ha troát sö la córna ciamàda "Esperance" le cundisiù piö favorévoi per el furmàs de la vìta mai troàde sö la superfìce de Marte.

I sò müimèncc i è comandàcc del Jet Propulsion Laboratory (JPL) che l'è 'n dipartimènt del California Institute of Technology che g'ha séde a Pasadena e che 'l gestés töt el progràma Mars Exploration Rover per la NASA.