Segunda Timotee Capitel Trii

Quel articul chì l'è scrivüü in Lumbard, cun l'urtugrafia insübrica ünificada.

Segunda Timotee

La Parola de'l nost Signur ciapada inscí cuma l'è de'l Növ Testament e vultada adess del test uriginal grech in del nost parlà Insübregh del didincö.

Capitel Trii

¹E che te sapiet chèst: che in di dì ültim ghe sarànn témp dificij: ²già che ghe sarànn personn che vören bén sé medemm, che vören bén el danee, che hinn baüsc, arugant, biastemiadúr, desübediént a i gént, che gh'hann minga grazi, hinn impi, ³sénza bén, implacábej, calüniús, hinn no temperaa, hinn selvadegh, sénza bén per chèll che l'è bun, ⁴balandron, temeree, spüzètt, che vören bén i piasè inscambi Diu, ⁵che gh'hann i form de la pietaa e reneghen la sua forza: turna tì via di taj personn. ⁶Già che de chèst personn hinn quij che vann denter fürtivamént in di cà e ciapen cuma presunee i donn balord caregaa de pecaa, menaa via de vari desidéri, ⁷insegnand semper e no mai capaz de rià a la cugnussénza de la veritaa. ⁸E in de la manéra che Janne e Jambre s'hinn upost a Musè, inscì chèst personn, curott de mént, refüdaa sü la féd, se uponen la veritaa. ⁹Ma lur narànn no tant püssee innanz, degià che la lur matada la sarà ciara a tücc, cuma l'è sücess anca per quij taj.
¹⁰Ma tì te see vegnüü adree a mì in de l'insegnamént, de la cundota, del pruposit, de la féd, de la paziénza, del bén, de la perseveranza, ¹¹in di persegütaziún, in di patimént, cuma l'è sücess a mì a Antiochia, a Iconi, a Listra--huu supurtii taj persegütaziún, e 'l Signúr el m'ha liberaa de tücc. ¹²Ma anca tücc che vören viv piamént in del Crist Gesü sarànn persegütaa. ¹³E personn malign e i gabamund narànn innanz de maa in pesg, imbrujand e essend imbrujaa. ¹⁴Ma tì: resta in di coss che te hee imparaa e de quij te see staa persuas, perchè te see de quij t'i hee imparaa, ¹⁵e che fin de bagaj te hee savüü i sacher Scritür, che hinn capaz de fàtt sàvi a salvéza per mèzz del féd che l'è in del Crist Gesü. ¹⁶Tüta la Scritüra l'è ispirada de Diu e ütil per l'insegnamént, el repià, la cureziún, l'istrüì in de la giüstizia, ¹⁷perchè 'l vèss üman de Diu el sia atrèzaa, furnii per ogni bun laur.

Navigaziun

• ← Indree a Capitel Düü
• Inanz a Capitel Quater →
• A l'indes