Sedell

Quest articol chì l'è scrivuu in lombard, grafia milanesa.

On sedell de plastega.

El sedell (o sedella, seggia, seccia o sidèll ) l'è on contenidor de forma cilindrega o conega. El gh'ha on'avertura in alt e on fond piatt. De solet l'è taccaa a on manegh a semiserc.
I sedei hinn doperaa di temp pussee antigh, soratutt per regoeuj l'aqua di fiumm o di pozz, e per trasportàlla in baril o alter contenidor pussee gross. Poeuden vess doperaa anca per trasportà sabbia, vernis o robb de mangià (per esempi, el latt mongiuu).
I sedei poeuden vess de legn (ciamaa anca seggiott o seggin), de aramm, de ramera, de coramm o anca de plastega. L'è compagn del cadin.

El nomm

La parolla sedell la vegn del latin sitellum, e l'è doperada anca in frances ("seau").
El termen seggia inveci l'è derivaa del latin volgar *sĭcla, evoluzion del classegh sitŭla. El termen l'è doperaa anca in italian ("secchio" e, antigament, anca "secchia"). "Sitellum" l'è on diminutiv de "situla".
La variant seccia l'è doperada in del Bressan.

Vos corelaa

• Cadin
• Seggiott