Sōsō no Furīren
|
Quest articol chì l'è scrivud in lombard, con la Noeuva Ortografia Lombarda |
Sōsō no Furīren (sgiapones: 葬送のフリーレン) l’è un manga sgiapones screit de la Kanehito Yamada e inlustrad del Tsukasa Abe. El titol de l’œuvra l’è stait voltad in ingles coma Frieren: Beyond Journey's End e in talian coma Frieren – Oltre la fine del viaggio; in lombard el podariss vesser tradut ind una manera pussee conservativa coma Frieren a l’obet o L’ultem salud de la Frieren ai mort. L’è stait serializad in su la revista Weekly Shōnen Sunday de la cà editris Shōgakukan a partì del 2020. Ind l’istess ann, Frieren l’ha vensgiud el premi Manga Taishō.[1] La serie l’è staita pœu datada televisivament ind un anime fait su de la Madhouse e transmiss del setember 2023 al marz 2024.
La storia l’è un fantasy che el ghe va adree a la Frieren, una maga elfa che la scomenza un viasg per rivà a un sit indova ghe se reuniss i aneme di mort, per vedé per l’ultema vœulta l’Himmel, un sò vegg amis che el gh’è pu.
Trama
[Modifega | modifica 'l sorgent]Frieren l’è una maga elfa che l’era ind una compagnia de venturer che haveven batud el Rè-Demoni e fait tornà a voltra la pas ind el mond adree a un viasg de des agn. El grup el toveva denter l’eroj uman Himmel, el guerrer nanegh Eisen e el prevet uman Heiter. Inanz de saludàss e spartìss, la compagnia la varda insema una piœuva de meteore, un event che l’ocorr nomà una vœulta ogna zinquant’agn. Frieren la promet ai amis che la prossema vœulta la je menarà adree ind un sit pussee bell per vedé i meteore, e je lassa ind la capital per indà via per la sò strada per muccià su cognossenza magega e descovrì striozz rar.
La Frieren la torna a la capital zinquant’agn adree; impunemanca, la sgent l’è cambiada fiss e i sò amis inn inveggid. Depos un’ultema ventura insema per vedé ancamò la piœuva de meteore, l’Himmel el mœur de veggezza. Duranta l’obet, Frieren la taca a luccià perchè la se incorsg de havé perdud una mota de temp che l’havariss podud dovrà per cognosser mej l’amis che l’è apena mort. I agn passen e Frieren la decid de indà a trovà i sò amis inanz che el saja trop tard. L’Heiter l’ha dotad una toseta orfena, Fern, e el ghe ciama a la Frieren de insegnàgh la magia, e l’elfa a la fin la ghe dis de sì. Quand che la visita l’Eisen, Frieren la descovriss ind un vegg liver de magia un sit indova es pœul incontrà i aneme di mort e la decid de partì per un viasg per vedé l’Himmel per un’ultema vœulta. Insema a la Frieren ghe va adree anca la Fern – fiœula dotiva del prevet Heiter – e el Stark – allev del guerrer nanegh Eisen.
Desgià che la Frieren l’è un’elfa, la gh’ha una vita longa longhenta, e zò el la mena a havé una concezzion del temp bella slargada; per esempi, la bacaja de l’esperienza de des agn passad con la compagnia de Himmel coma se la fudess un viasget che l’è durad poch. La storia, donca, la dopera un frach i flashback per ligà insema el present de la Frieren al sò passad, e fà vedé quant lee l’è dree a marudà coma persona.
Personasg
[Modifega | modifica 'l sorgent]
Compagnia de la Frieren
[Modifega | modifica 'l sorgent]- Frieren (フリーレン Furīren?)
- L’è una maga elfa che la gh’ha bontemp e ghe pias viver a la sgiornada. Ancaben che la gh’haiva sgiamò pussee de milla agn, quii de la sò razza la consideren ancamò una sgiovinota. Desgià che la manera che la perzepiss el temp l’è deversa de quella dei uman, a ghe interessa nò fà negota o lavorà per mis o infinamai agn intregh a la vœulta. Adree a la mort de l’Himmel, la Frieren la se sent in colpa per viver a quella manera chì, e la rempiansg de havéll minga cognossud mej ind la sò veggia ventura de des agn. De conseguenza, l’invia fœura a viasgià un’oltra vœulta per imprender pussee robe in sui uman. Intratanta, la ghe insegna la magia a Fern.
Pussee de milla agn indree, l’arzimaga Flamme l’ha salvad la Frieren di demoni che haveven tacad el pajes de l’elfa. Quell’esperienza traumatega chì l’ha menad la Frieren a havégh in œudi tucc i demoni, cont el rivà a volé copàj tucc. La deventarà la persona che l’ha mazzad pussee demoni ind la storia, cont el gadegnà la scomagna de “Frieren la sassina”.
Desgià che l’è un’elfa, Frieren la fa fadiga a capì ben i emozzion dei uman, e di vœulte la pœul parì una persona freggia. Impunemanca, l’è bona coma el pan e la se incura fiss di persone che la gh’ha in cœur.
- Fern (フェルン Ferun?)
- Una maga sgiovena, prendisa de la Frieren. La ven del sud del continent e l’è un’orfena de guerra. La ven dotada de l’Heiter e l’incontra la Frieren a nœuv agn, quand che lee chì la ven a trovà l’amis prevet. Heiter el ghe rœuga a Frieren de insegnàgh la magia a la toseta, e l’elfa la deventa la sò majestra. Quand che Fern la gh’ha quindes agn, l’Heiter el mœur e lee la scomenza a viasgià insema a la Frieren. Pussee tard, la ven una maga de prima class. La trata mal Stark a l’inizzi, ma la sò relazzion la mejorarà cont el temp.
- Stark (シュタルク Shutaruku?)
- Un sgiovinot che l’Eisen l’ha cressud e che el gh’ha insegnad a combater. L’è el guerrer de la compagnia, e el se taca adree ai dò maghe desgià che l’Eisen l’è sgiamò trop vegg per viasgiàgh insema. Ancaben che el saja asquas semper stremid di sò desenemis, Stark l’è sossenn fort e l’è un amis lial. Ghe pias la Fern, ma lee di vœulte la le trata mal.
- Sein (ザイン Zain?)
- Un prevet de pajes che el se sgionta adree a la compagnia per un poo. El gh’ha una mota de vizzi: ghe pias tabacà, el sgiœugh d’azard e i fomen marude. El se spartiss del grup per indà a descovrì cossa gh’è suzzess a un sò vegg amis che l’haveva lassad el sò pajes des agn indree.
Compagnia de l’eroj Himmel
[Modifega | modifica 'l sorgent]
La compagnia che Frieren la s’era tacada adree ind el sò prim viasg de des agn per bater el Rè-Demoni. Inn stait insema infina al mazzament del Rè-Demoni, per pœu spartìss a l’inizzi de la storia. Normalment, el grup el compariss ind i flashback de la Frieren.
- Himmel (ヒンメル Hinmeru?)
- L’eroj del grup. Adree a la prima piœuva de meteore, lu e la Frieren se prometen de incontràss ancamò. El mœur de veggezza apœus a la reunion soa de lor duu. In pussee ocasion, se ved che ghe piaseva la Frieren, ma la perzezzion del temp soa de lee e la dificoltaa che la gh’ha a capì i sentiment dei uman eren un ostagol per la sò relazzion.
- Heiter (ハイター Haitā?)
- Un prevet uman che ghe piaseva propri tanta sbagascià. L’ha trovad, dotad e cressud la Fern quand che la compagnia la s’è spartida. El mœur a l’inizzi de la storia.
- Eisen (アイゼン Aizen?)
- El guerrer de la compagnia. L’è un nan che, ancaben che el viva minga inscì tanta coma i elf, el gh’ha una vita pussee longa de quella dei uman. Impunemanca, l’è sgiamò deventad vegg e, inscambi de sgiontàss adree a la nœuva compagnia de la Frieren per un’oltra ventura, el ghe conseja de tœùss adree el Stark.
Media
[Modifega | modifica 'l sorgent]
Manga
[Modifega | modifica 'l sorgent]Sōsō no Furīren l’è scrivud de la Kanehito Yamada e inlustrad del Tsukasa Abe. La serie l’è scomenzada el 28 de avril 2020 e publegada ogna semana in su la revista Weekly Shōnen Sunday de la Shōgakukan.[2][3] El prim volum in formad tankōbon l’è stait publegad el 18 de vost del 2020.[4]
L’edizzion taliana l’è publegada de la Edizioni BD a partì del 13 de occiover del 2021.[5][6]
Anime
[Modifega | modifica 'l sorgent]Ind el setember 2022, gh’è stait nonziad in su la covertina del volum qd9 del manga che la serie la sariss staita datada ind un anime.[7][8] La serie televisiva l’è produta de Madhouse e direta del Keiichirō Saitō; la musega l’è composuda de l’Evan Call.[9] I prim quater episodi inn stait transmiss in television el 29 de setember del 2023 in su l’emitent Nippon TV ind un orari de solit reservad ai cinema.[10][11] La prima seson l’è fenida el 29 de marz del 2024.
Crunchyroll el gh’ha la lizzenza per la serie de defœura de l’Asia.[12]
Rezzeviment
[Modifega | modifica 'l sorgent]Al marz del 2021 Sōsō no Furīren el gh’haveva oltra 2 milion de copie in zircolazzion;[13] oltra 5.6 milion al fevrer 2022 e pussee de 6 milion a sgiugn de l’istess ann;[14] oltra 7.2 milion de copie in zircolazzion al setember 2022[15] e pussee de 8 milion de copie a marz 2023; oltra 10 milion de copie a setember 2023;[16] oltra 17 milion de copie a desember 2023[17] e oltra 20 milion de copie a marz 2024.[18]
Ind el 2021 l’œuvra l’è staita nomenada per el Premi coltural Osamu Tezuka qd25,[19] per el Premi Kodansha qd45 per i manga ind la categoria shōnen,[20] e l’ha vensgiud el Manga Taishō qd14.[1][21][22]
La Rebecca Silverman de Anime News Network la gh’ha dait al prim volum un A-. Silverman l’ha lodad el concet de la Frieren che la soraviv ai sò amis e l’è constreccia a viver cont una comprension del mond uman e di sò emozion, cont el defenìll “un’interpretazzion interessanta del sgender fantasy”. Tamen, Silverman l’ha anca deit che i dissegn inn minga “bei assee per representà emotivament la storia” e che la prendisa de Frieren, la Fern, la gh’havariss besœugn de “pussee personalitaa”.[23]
Referenze
[Modifega | modifica 'l sorgent]- ↑ 1,0 1,1 (EN) Rafael Antonio Pineda. «14th Manga Taisho Awards Nominate 10 Titles». Anime News Network, 24 gennaio 2021. Vardad in data 25 gennaio 2021.
- ↑ (JA) «魔王を倒した勇者一行の“その後”描く「葬送のフリーレン」サンデーで開幕». Natalie, 28 aprile 2020. Vardad in data 13 maggio 2020.
- ↑ (JA) 少年サンデー ２２・２３号. Shōgakukan. URL consultad in data 4 maggio 2021. (arqiviad de l'url orijenal)
- ↑ (JA) 葬送のフリーレン 1. Shogakukan. URL consultad in data 18 aprile 2021.
- ↑ «Hanami Manga Festival: annuncio J-POP (secondo giorno)». AnimeClick.it, 11 aprile 2021. Vardad in data 4 maggio 2021.
- ↑ «6 nuovi manga annunciati da J-Pop». Fumettologica, 11 aprile 2021. Vardad in data 4 maggio 2021.
- ↑ Hodgkins, Crystalyn (September 9, 2022). Frieren: Beyond Journey's End Manga Listed With Anime.
- ↑ Pineda, Rafael Antonio (September 12, 2022). Frieren: Beyond Journey's End Manga's Anime Adaptation Confirmed.
- ↑ Pineda, Rafael Antonio (March 8, 2023). Frieren: Beyond Journey's End Anime's Promo Video Reveals Cast, Staff, Fall Premiere.
- ↑ Cayanan, Joanna (September 27, 2023). Frieren: Beyond Journey's End Anime Reveals Half-Year Run, Premiere's Special Ending Song.
- ↑ Loo, Egan (June 29, 2023). Frieren: Beyond Journey's End Anime's 2nd Video Unveils 2-Hour September 29 Debut.
- ↑ Hodgkins, Crystalyn (July 15, 2023). Crunchyroll to Stream Frieren: Beyond Journey's End, A Girl & Her Guard Dog Anime.
- ↑ (JA) «マンガ大賞受賞作「葬送のフリーレン」4巻明日発売、読売新聞朝刊に全面広告も». Natalie, 16 marzo 2021. Vardad in data 17 marzo 2021.
- ↑ (JA) ja:新章開幕「葬送のフリーレン」8巻、色鮮やかなステッカー20種付き特装版も登場. Natasha, Inc., 17 giugno 2022. URL consultad in data 17 giugno 2022. (arqiviad de l'url orijenal)
- ↑ (JA) ja:「葬送のフリーレン」アニメ化決定！勇者一行の“その後”の世界を描くファンタジー. Natasha, Inc., 13 settembre 2022. URL consultad in data 13 settembre 2022. (arqiviad de l'url orijenal)
- ↑ (JA) ja:『葬送のフリーレン』最新刊11巻発売！ 作中に出てくる一風変わった魔法をモチーフにした魔導書型ミニノート(全8種)がもらえる書店ノベルティフェア開催！. Shogakukan, 13 settembre 2023. URL consultad in data 11 dicembre 2023. (arqiviad de l'url orijenal)
- ↑ Anita Tai. Frieren Manga Adds 7 Million Copies to Circulation in 2 Months Since Anime's Premiere. 4 dicembre 2023. URL consultad in data 4 dicembre 2023. (arqiviad de l'url orijenal)
- ↑ Marko Jovanovic. (EN) Frieren Manga Sales Doubled After the Anime Adaptation. 2024-03-24. URL consultad in data 2024-04-02.
- ↑ (EN) Egan Loo. «Demon Slayer, Jujutsu Kaisen, Promised Neverland Nominated for Tezuka Osamu Cultural Prize». Anime News Network, 25 febbraio 2021. Vardad in data 26 febbraio 2021.
- ↑ (EN) Rafael Antonio Pineda. «45th Annual Kodansha Manga Awards' Nominees Announced». Anime News Network, 7 aprile 2021. Vardad in data 7 aprile 2021.
- ↑ (EN) Crystalyn Hodgkins. «Frieren: Beyond Journey's End Wins 14th Manga Taisho Awards». Anime News Network, 15 marzo 2021. Vardad in data 15 marzo 2021.
- ↑ (JA) «マンガ大賞2021、大賞は山田鐘人・アベツカサ「葬送のフリーレン」». Natalie, 16 marzo 2021. Vardad in data 16 marzo 2021.
- ↑ Rebecca Silverman. (EN) Frieren: Beyond Journey's End GN 1 - Review. 9 novembre 2021. URL consultad in data 18 novembre 2021.
Per savénn pussee
[Modifega | modifica 'l sorgent]- Eisenbeis, Richard (January 31, 2022). Frieren: Beyond Journey's End is the Best Manga I Have Ever Read. Anime News Network. (EN)