Rumàn Capitel Vündes

Quel articul chì l'è scrivüü in Lumbard, cun l'urtugrafia insübrica ünificada.

Rumàn

La Parola de'l nost Signur ciapada inscí cuma l'è de'l Növ Testament e vultada adess del test uriginal grech in del nost parlà Insübregh del didincö.

Capitel Vundes

¹Dunca, disi: Diu l'ha mandaa indree la sua gént? Che 'l sia no: già che anca mì sun Israelìtt, de la suménza de l'Abraham, de la tribü de Benjamìn. ²Diu l'ha minga mandaa indree la sua gént che l'ha cugnussüü prima. O savii no che cossa la Scritüra la dis in d'Elia, cuma 'l prega a Diu cuntra l'Israel? ³«Signúr, hann mazaa i tò prufètt, hann sbatüü giò 'l tò altar, e mì sull sun lassaa, e lur cerchen la mia vida». ⁴Ma che cossa la dis la resposta divina? Huu reservaa per mì medemm sètt mila omen, che s'hinn minga inchinaa un genögg a Baal». ⁵Dunca, inscì anca in del témp presént l'è staa un rèst segund la scernida de la grazia. ⁶E se l'è per la grazia, l'è pü di laur, sedenò la grazia la sarìa pü la grazia.
⁷Dunca, che cossa? L'Israel l'ha minga utegnüü chèll che l'ha cercaa, e la scernida la l'ha utegnüü; ma 'l rest l'è devegnüü dür, ⁸propi cuma l'è scritt:
«Diu 'l gh'ha daa un spirit de lifa
ögg per vedè no,
urègg per sentì no,
fin al dì d'incöö».
⁹E David el dis:
«Che la lur taula la devegna una trapa e un lazz
e un scapüsc e un pagà indree per lur;
¹⁰che i lur ögg sien faa scür per vedè no,
e piega la lur schèna per semper».
¹¹Dunca disi, s'hinn scapüsciaa perchè burlassen giò? Che 'l sia no: ma per la lur trasgressiún la salvéza l'è a i naziún per pruvucàj a gelusìa. ¹²E se la lur trasgressiún l'è la richéza del mund e la lur perdida l'è la richéza di naziún, quant püssee l'è la lur pienéza. ¹³E ve disi, vialter i naziún: dunca, in de quant sun apostul di naziún, duu gloria al mè ministéri, ¹⁴se forsi pruvucassi la mia carna a gelusìa e salvassi quij de lur. ¹⁵Già che se 'l lur refüd l'è la recunciliaziún del mund, che cossa l'è 'l lur ricév se no la vita di mort? ¹⁶E se la primizia l'è santa, anca l'è 'l gnocul; e se la radis l'è santa, anca hinn i ramm.
¹⁷Ma se quij di ramm hinn staa tajaa via, e tì che te see d'una uliva selvadega te see staa insedii intra lur e te see devegnüü vün che 'l ciapa part de la radis de la grasséza de l'uliva, ¹⁸vantet no cuntra i ramm; ma se te vantet, l'è no tì che te portet la radis, ma la radis la te porta. ¹⁹Dunca, te diree: «Ramm hinn staa tajaa via perchè mì füssi insedii». ²⁰Bén; hinn tajaa via per l'infedeltaa, ma tì te see staa sald per la féd. Pensa no alt robb, ma pagüra: ²¹già che se Diu l'ha minga sparmii i ramm segund natüra, né 'l te sparmarà. ²²Dunca, ved la gentiléza e la severitaa de Diu: sü quij che hann burlaa giò, la severitaa, e sü tì, la gentiléza de Diu, se te cuntinüet in de la gentiléza, sedenò anca tì te saree tajaa via. ²³E se anca lur cuntinüen no in de la mancanza de féd, sarànn insedii; già che Diu l'è capaz de insedìj de növ. ²⁴Già che se tì te see tajaa via de l'uliva selvadega segund natüra, e te see staa insedii in de l'uliva dumestega cuntra natüra, tant quant püssee chèst che hinn segund natüra sarànn insedii in de la sua uliva!
²⁵Già che vöri no che siuv ignurant, fradèj, de chèst mistéri, che siuv no savi in de vialter medemm, che l'è sücess un indürimént de part a l'Israel fin che la pienéza di naziún l'è vegnüü denter, ²⁶e inscì tütt l'Israel el sarà salvaa, cuma l'è scritt:
«Lü che 'l libera 'l vegnarà de Zion,
el girarà via l'impietaa de Giagum.
²⁷E chèst l'è 'l mè acordi cun lur,
quand avaruu tolt via i lur pecaa».
²⁸Menter segund el vangel hinn nemìs per via de vialter, segund la scernida hinn predilètt per via di pader: ²⁹già che i regaj e la ciamada de Diu hinn sénza pentimént. ³⁰Già che propi cuma vialter una völta sii staa desübediént a Diu, e adèss avii ricevüü misericordia per la lur desübediénza, ³¹inscì anca chèst hinn staa desübediént per la vostra misericordia, per chè adèss anca lur riceven misericordia. ³²Già che Diu l'ha metüü denter tücc in de la desübediénza, per avègh misericordia a tücc.
³³O prufunditaa de richéza,
e saviéza e cugnussénza de Diu--
che incercabij hinn i sò giüdizi,
e incumprensibij i sò vì.
³⁴«Defàtt, chi l'ha cugnussüü la mént del Signúr?
O chi l'è devegnüü 'l sò cunsiliér?
³⁵O chi 'l gh'ha daa prima,
e 'l gh'ha daa recumpénsa?».
³⁶Perchè de Lü, per mèzz de Lü e per Lü hinn tüsscoss;
a Lü sia la gloria per semper, amén.

Navigaziun

• ← Indree a Capitel Des
• Inanz a Capitel Dudes →
• A l'indes