Rumàn Capitel Dudes

Quel articul chì l'è scrivüü in Lumbard, cun l'urtugrafia insübrica ünificada.

Rumàn

La Parola de'l nost Signur ciapada inscí cuma l'è de'l Növ Testament e vultada adess del test uriginal grech in del nost parlà Insübregh del didincö.

Capitel Dudes

¹Dunca, ve dumandi, fradèj, per i cumpassiún de Diu, a presentà a Diu i voster corp cuma un sacrifizi vivént e sant, piasevul l'è 'l voster servizi resunévul; ²e cunfurmeev a chèsta etaa, ma che siuv trasfurmaa per el renuamént de la mént perchè pruuv che cossa l'è la vuluntaa de Diu, bona, piasevula e perfèta.
³Già che, per mèzz de la grazia che 'l m'è stada dada, disi a ognidün che l'è intra vialter de pensà no de sé medemm püssee che 'l sia necessari che pensuv, ma de pensà per vèss san de mént a ognidün cuma Diu l'ha daa una mesüra de la féd. ⁴Già che propi cuma gh'èmm in d'un corp tant part, ma tücc i part gh'hann minga la medema aziún, ⁵inscì nümm, i tant, sèmm vün corp in del Crist, e chèll che l'è cuma vün l'è part el vün de l'alter. ⁶E degià che gh'èmm regaj divèrs segund la grazia che la m'è stada dada, se prufezìa segund la prupurziún de la fed, ⁷se servizi in del servizi, se vün che l'insegna in de l'insegnamént, ⁸se vün che l'incuragia in de l'incuragiamént; vün che l'impart, cun sempicitaa; vün che l'è sura alter, cun diligénza; vün che 'l fa misericordia, cun baldoria.
⁹Che 'l bén el sia sénza ipucrisìa; aburii el maa, che siuv culaa al bén, ¹⁰vurii bén el vün vèrs i alter per el bén di fradèj, menee innanz i alter in de l'unúr, ¹¹che siuv no patamola in de la diligénza, che siuv fèrz in del Spirit, servii Diu ¹²avendugh letizia in de la speranza, perseverand in de l'afliziún, cuntinüand sald in de la preghéra, ¹³ciapee part in di besogn di sant, cerchee 'l bén di furestee. ¹⁴Benedisii quij che persegüten; benedisii e maledisii no. ¹⁵Che gh'avii letizia cun quij che gh'hann letizia, piangii cun quij che piangen. ¹⁶Pensee la medema roba el vün vèrs i alter, pensand minga alt robb ma che siuv menaa via cunt i ümij. Che siuv no savi de vialter medemm. ¹⁷Dee minga indree maa per maa, ma pensee a fà i bonn robb denanz a tücc i vèss üman; ¹⁸Se chèll che l'è de vialter l'è pussibil, fee la pas cun tücc i vèss üman; ¹⁹Vendicheev no, fradèj, ma dee 'l lögh per l'ira, già che l'è scritt: «La vendèta l'è mia, mì pagaruu indree, el dis el Signúr». ²⁰Ma «se 'l tò nemís el gh'ha famm, dagh de mangià; se 'l gh'ha séd, dagh de bév; già che fasend chèst te müciaree carbún de fögh sü la sua crapa». ²¹che te see no vint del maa, ma vinci 'l maa cunt el bun.

Navigaziun

• ← Indree a Capitel Vundes
• Inanz a Capitel Trides →
• A l'indes