Rit patriarchin
|
Quest articol chì l'è scrivud in lombard, con la Noeuva Ortografia Lombarda |
El rit patriarchin a l'era un rit antigh de la gesa latina doperad fina a la fin del secol XVI in di patriarcad de Aquileja, Grad e Venezzia.
El Cromazzi d'Aquileja el notava di diferenze che 'l svesinaven ai tradizzion orientai, compagn de:
- La lavanda di pè prima del batesim (menter in del rit ambrosian l'era dopo), deventada poeu el rit del sgiovedì sant
- L'identifegazzion de la Pasqua con la Passion del Gesù intrega
- El doperà, tant 'me in la tradizzion de Smirne, el leon per el San Giovann e no per el San March, l'Ironem el cambiarà però quella tradizzion chi
Resistid anca al scisma tricapitolin, l'è rivad a vesser doperad fina a Monscia e a Com, cont el temp però el s'è svesinad semper pussee a quell roman e del 1456 Venezzia el bandona, foeura che per la basilega de San March, e dopo el Concili de Trent, la diocesi de Triest el bandona del 1586 e Aquileja del 1596. La diocesi de Com la insist per tegnìll ma el Papa Clement VIII i oblega a bandonàll, e 'l farann del 1598. Domà a San March, che l'era basilega de Stat de la Republega de Venezzia, el resta doperad fina al 19 de otover 1809, quand che l'è ciapada 'me catedral del patriarcad de Venezzia e la deventa de rit roman anca lee.
Al dì d'incoeu el lezzionari roman in lengua forlana, aprovad del 2004, el gh'ha dent di cant de tradizzion patriarchina.
Diferenze cont el rit roman
[Modifega | modifica 'l sorgent]I diferenze principai cont el rit roman eren:
- L'advent el durava cinch domeneghe e minga quater
- El San Steven l'era celebrad el 27 de dicember e no el 26, tant 'me in del rit antiochen
- El preparàss a la Quaresma l'era fad domà in do domeneghe, o ben la Quinquagesima e la Sessagesima, senza donca la Settuagesima
- In del preparàss a la Pasqua se faseven do messe sia la domenega prima sia el sgiovedì sant, tant 'me in del rit gallician
- El celebrà de la meza-Pentecost, tant 'me in vari rit orientai