Retrovirus endogen

Quest articol chì l'è scrivud in lombard, con la Noeuva Ortografia Lombarda

I retrovirus endogen (breviad ERV) inn di element virai endogen che se troeuven in del genoma e che regorden, e se pensa che deriven, de retrovirus che s'inn sgiontad al DNA e inn propi spantegad in del patrimoni genetich di gnastostoma: in l'om, se stima che in tra el 5% e 'l 8% del DNA l'è fad su de geni derivad de 'sti retrovirus e domà el 1% de 'sto patrimoni chi l'è desligad de quell del scimpanzè, i inscì ciamad retrovirus endogen uman K. A bon cunt, però, se troeuven in del patrimoni genetich de tucc i eucariota.

Se pensa che 'sti virus chi, che de solit infeten cellule somateghe, habien infetad per una quaj reson i cellule geminai e che donca i mutazzion che menen sien rivade in di fioeui de quei infetad e, cont el temp, s'inn spantegad in varie spece. Comunque, gh'è anca di biolegh che sostegnen che i retrovirus vegnen di retrotrasposon e che, donca, di toch genetich che poden vesser sociad ai retrovirus podarien inveci vegnì de lor.

El genoma che menen l'influenza i spece che ghe l'hann: in l'om inn responsabil in part del sistema imunitari innat e de la placenta e podarien anca vesser ligad al desvilup de la schizofrenia. Un studi del 2023 el sostegn che l'ativazzion de 'sti retrovirus la sia ligada al deventà vegg, e che donca con di anticorp specifegh che i fermen se podaria rallentà el process. Se pensa che anca virus compagn de l'HIV-1, de l'HTLV-1, de l'influenza A, de l'epatita C, del SARS-CoV-2, del virus de Epstein-Barr o de l'Herpesvirus sociad al sarcoma de Kaposi sien boni de reativà 'sti virus, e in vitro el s'è vist che 'l podaria havégh un roeull in del desvilup de la sclerosi multipla.

Semper in medesina, i retrovirus engoden di sonin gh'hann de vesser tegnud a ment quand che se fann di xeno-strepiant: de solit el porscell l'è l'animal pussee bon che se po doperà per ciapà tessut per l'om, ma el so genoma el gh'ha dent di ERV che l'è possibel che se ativen e che infeten la persona, soratut se la gh'ha 'na depression imunitaria, 'me tant che gh'hann havud un strepiant e ciapen di cure per schivà che l'orghen el sia refudad del corp, cont el ris'c che 'sti virus vaghen dent al genoma di omen. In del 2017, un laboratori, a doperà la CRISPR Cas9, l'ha tolt via tucc i 62 ERV del porscell. Alter bestie con virus endogen che poden infetà e reprodùss in l'om inn el gat, el rat e 'l baboin.

Riferiment[Modifega | modifica 'l sorgent]

Vos corelade[Modifega | modifica 'l sorgent]