Prima Timotee Capitel Düü

Quel articul chì l'è scrivüü in Lumbard, cun l'urtugrafia insübrica ünificada.

Prima Timotee

La Parola de'l nost Signur ciapada inscí cuma l'è de'l Növ Testament e vultada adess del test uriginal grech in del nost parlà Insübregh del didincö.

Capitel Düü

¹Dunca, esurti prima de tüsscoss che sien faa süplegh, preghér, petiziún e rengraziamént per tücc i personn, ²per i rè e tücc che hinn in d'auturitaa, perchè passum una vita quieta e quacia in tüta la pietaa e dignitaa. ³Chèst l'è bun e cetabil denanz a Diu, el noster Salvadúr, ⁴che 'l vör che tücc i personn sien salvaa e vegnen a una cugnussénza de la veritaa.
⁵Già che Diu l'è vün,
e vün l'è 'l mediadúr intra Diu e i vèss üman,
el vèss üman Gesü Crist,
⁶che 'l s'è daa cuma un riscatt per tücc,
la testimunianza a i sò propi témp.
⁷del qual mì sun staa faa arald e apostul--disi la veritaa, busardi no--un insegnant di naziún in de féd e veritaa.
⁸Dunca, vöri che tücc i personn preghen in d'ogni lögh, levand sü mann sant sénza ira e scumbatt.
⁹In de l'istèssa manéra, i donn duarìen vestìss in de vestii mudèst, cun vergogna e cuntroll de sé medemm, no cun quazz e or, o pèrl o vestiari tant car, ¹⁰ma chèll che 'l sta bén per donn che pruclamen reverénza per mèzz di bonn laur. ¹¹Una dona la duarìa imparà cun quiett e tüta sutamissiún. ¹²A lassi minga che una dona l'insegna né la guerna un omm, ma la sia in de quiett. ¹³Già che l'Adam l'è staa furmaa prima, alura l'Eva. ¹⁴E l'Adam l'è minga staa imbrujaa, ma la dona, despö che l'è stada imbrujaa, l'è vegnüda in de trasgressiún; ¹⁵ma la sarà salvada per mèzz de la gravidanza, se resten in de féd, bén e santitaa cun cuntroll de sé medemm.

Navigaziun

• ← Indree a Capitel Vün
• Inanz a Capitel Trii →
• A l'indes