Prima Tessalunices Capitel Trii
|
|
Quel articul chì l'è scrivüü in Lumbard, cun l'urtugrafia insübrica ünificada. |
Prima Tessalunices
[Modifega | modifica 'l sorgent]La Parola de'l nost Signur ciapada inscí cuma l'è de'l Növ Testament e vultada adess del test uriginal grech in del nost parlà Insübregh del didincö.
Capitel Trii
[Modifega | modifica 'l sorgent]1Perchè, già che supurtavum pü, èmm ciapaa de vèss lassaa dedree a Aten depernümm 2e èmm mandaa Timutee, el noster fradèll e minister de Dee in del vangel de Crist, per stabilìv e incuragiàv in de la vostra féd, 3perchè nigün el sia scurlaa in de chèst turmént, già che vialter medemm savii che a chèst sèmm staa destinaa. 4Defàtt, anca quand serum cun vialter, ve disevum prima che serum 'dree a vèss turmentà, propi cumè anca l'è sücèss, e 'l savii. 5Per chèst, già che supurtavi pü, anca mì huu mandaa per savè la vostra féd, no cumè el tentadúr el ve tentava e 'l noster travaj l'era no svöj.
6Ma adèss che Timutee l'è vegnüü a nümm de vialter e 'l m'ha dii la bona nüntizia de la vostra féd e bén, e che gh'avii semper un bon regurd de nümm intanta che desiderii vedèmm propi cumè anca nümm vialter, 7per chèst serum incuragiaa, fradèj, sü vialter, in d'ogni noster besogn e turmént per via de la vostra féd, 8perchè adèss vivum se stii sald in del Signúr. 9Già che qual gratitüdin[1] podum dà cumè recumpénsa per vialter, per tüta la letizia che gh'èmm per via de vialter denanz al noster Dee, 10intanta che nocc e dì pregum tant[2] per vedè el voster mostass e mendà i coss che manchen in de la vostra féd?
11E 'l noster Dee e Pader medemm e 'l noster Signúr Gesü el faga dricia la nostra via a vialter; 12e 'l ve faga crèss e 'l faga bundà 'l voster bén el vün per l'alter e per tücc, propi cumè nümm a vialter, 13per stabilì i voster cör ireprensibil in de la santitaa denanz al noster Dee e Pader a la vegnüda del noster Signúr Gesü cun tücc i sò sant.