Prima Peder Capitel Trii

Quel articul chì l'è scrivüü in Lumbard, cun l'urtugrafia insübrica ünificada.

Prima Peder

La Parola de'l nost Signur ciapada inscí cuma l'è de'l Növ Testament e vultada adess del test uriginal grech in del nost parlà Insübregh del didincö.

Capitel Trii

¹In de l'istèssa manéra, i miee gh'avarìen de sutametes a i propi marì, perchè, se quij übeden no la parola, travèrs el cumpurtamént di lur miee sénza la parola sarànn vadagnaa ²quand i varden el voster cumpurtamént pür in de pagüra. ³Del qual el gh'avarìa no de vèss l'intrècc di cavèj, el mètt inturna di bisgiù d'or o el mètt sü di vestii, ⁴ma el vèss üman scudun del cör in de l'urnamént incurutìbil del spirit mansüètt e quiett, la qual ò'è del gran valúr denanz de Diu. ⁵Già che inscì i donn sant che speren in de Diu s'hinn urnaa, cunt el sutametes a i propi marì, ⁶cumè Sara l'ha übedii Abraàm, e 'l gh'ha ciamaa signúr; de la qual sii staa devegnii fiöö--se fii el bén e gh'avii nigüna pagüra.
⁷In de l'istèssa manéra, i marì, stee de cà insèma cun la cugnussénza de lur, e dee l'unúr cumè al vas püssee dèbul, a la fèmina, cumè anca ered insèma a la grazia de la vita, perchè i voster preghee sien minga impedii.
⁸E finalamént, che tücc sien d'acord, sien simpategh, vören bén i fradèj, gh'hann cumpassiún, sien gentil, ⁹e paghen minga indree mal per mal o ufésa per ufésa, ma al cuntràri benedisen, perchè al chèst sii staa ciamaa per eredità benediziún.
¹⁰Già che
«Lü che 'l desidéra a vurì bén la vida
e vedè bonn dì
el gh'avarìa de fàss tasè la lengua de mal
e laver de parlà fufigna,
¹¹el gh'avarìa de vultà via de mal e fà el bén,
e cercà la pas e nànn adree.
¹²perchè i ögg del Signúr hinn sü i giüst,
e i so urègg hinn sü i lur uraziún,
e la ghigna del Signúr l'è cuntra lur che fann el mal».
¹³E chi l'è che 'l fa el mal a vialter se devegnii zelant del bén? ¹⁴Ma se anca patii per la giüstizia, sii beàtt. Che gh'avii no de 'vègh pagüra de lur, né metiiv sott-sura; ¹⁵e fee sant Crist cumè Signúr in di voster cör, e che sii semper prunt a una defésa a chissessìa ve dumanden resún de la speranza che l'è in de vialter, ¹⁶ma cun ümiltaa e pagüra, cunt una bona cuscénza, perchè quand sii slenguasciaa, sien vergugnaa lur che ve strapénen el voster bun cumpurtamént in de Crist. ¹⁷Già che l'è mèj, se l'è la vuluntaa di Diu, che patuv perchè fii el bén invéci de perchè fii el mal. ¹⁸Perchè anca Crist una völta l'ha patii per i pecaa, giüst per in giüst, perchè 'l ve mena a Diu, essend faa mort a la carna ma daa la vita al Spirit; ¹⁹in del qual l'è naa e l'ha predegaa anca a i spirit in de presún, ²⁰perchè hann übedii no prima quand la paziénza de Diu l'ha speciaa, in di dì de Nuè, intanta che 'l maniva l'arca, in de la qual i poch, l'è de dì che vott anemm, hinn salvaa per l'aqua. ²¹A chèst mudel l'è 'l batésim che adèss el ve salva (no el tö via el bordegh de la carna ma la dumanda d'una bona cuscénza a Diu), travèrs la resüreziún de Gesü Crist, ²²che l'è a la drita de Diu, depus che l'è naa a i cel, e sutametüü a se medemm angiul, auturitaa e puténz.

Navigaziun

• ← Indree a Capitel Düü
• Inanz a Capitel Quater →
• A l'indes