Prima Peder Capitel Cinch

Quel articul chì l'è scrivüü in Lumbard, cun l'urtugrafia insübrica ünificada.

Prima Peder

La Parola de'l nost Signur ciapada inscí cuma l'è de'l Növ Testament e vultada adess del test uriginal grech in del nost parlà Insübregh del didincö.

Capitel Cinch

¹Dunca, a dumandi i anzián intra de vialter, mì che sun anzián cun vialter e testimun di patimént de Crist, e anca che faruu part de la gloria che l'è dree a vèss revelaa; ²tegnii el rosc de Diu intra vialter, no per forza ma vuluntari denanz de Diu, no per una mangerìa ma vulentéra, ³né cumè tegnend in de südiziún la vostra purziún di personn ma devegnend esempi del rosc; ⁴e quand el sarà revelaa el Prénzip di pastúr utegnarii la curona de la gloria che la se sföja no.
⁵In de l'istèssa manéra, giüìtt, sutametiiv a i anzián. E vestiiv tücc d'ümiltaa el vün vèrs i alter, perchè
«Diu el s'uponn ai arugant, ma ai ümil el da grazia».
⁶Dunca, ümilieev suta la man puténta de Diu, perchè la ve lev in alt a témp, ⁷e tree ogni voster preucüpaziún sü Lü, perchè vialter gh'impurtii a Lü.
⁸Che siuv muderaa e stee sü. El voster nemìs, el diàul, el camina, cumè un leún rügend, cercand de majà. ⁹Resisteel, sald in de la féd, già che savii che i 'stèss géner di patimént se cumpen in de la vostra fradelanza in del mund. ¹⁰e 'l Diu de ogni grazia, che 'l v'ha ciamaa a la sua gloria etèrna in de Crist, despö che avarii patii per pocch témp, Lü medemm ve farà perfètt, sald, fort, stabil. ¹¹A Lü sia la puténza per sémper. Amén.
¹²Per Silvàn, noster fradèll fédel, cumè mì ghe pensi, huu scrivüü cürtamént, pregand e dand testimoni che chèsta l'è la vera grazia de Diu; in de lee stee sald. ¹³Lee che l'è a Babilòn, che l'è scernida insèma, la ve salüda, e anca March, el mè fiöö. ¹⁴Salüdeev el vün i alter cunt un basìn de bén. Pas a vialter tücc che sii in de Crist.

Navigaziun

• ← Indree a Capitel Quater
• Inanz a Segunda Peder Capitel Vün →
• A l'indes