Pont Vegg (Lecch)
El Pont Vegg (italian: Ponte Azzone Visconti o Ponte Vecchio) a l'è 'l pont pussee antigh de la citaa de Lecch.
El se troeuva de soravia a l'Ada, e 'l colega Lecch cont el paes de Malgraa.
Storia
[Modifega | modifica 'l sorgent]El pont l'è staa progettaa in del secol XIV per miorà i colegament in tra Lecch e 'l Statt de Milan, che l'aveva conquistaa el borgh in del 1335. A vorell a l'è staa l'Azzon Viscont (1302-1339), che 'l gh'aveva el progett de fà vegnì Lecch ona fortezza importanta in del sistema difensiv del statt milanes, per via de la soa posizzion strengiuda in tra el Lagh de Comm, l'Ada e i montagn de la Valsasna.
El pont l'è staa faa su in tra el 1336 e 'l 1338, e l'è staa fortificaa de bon: el gh'aveva dò tor (con scià on rivellin e trii pont levador) ai duu coo del pont, ona tor in del mez, ona rocchetta e ona colombera per i pivion viaggiador. Al temp di Spagnoeu el gh'eva ona guarnison de vint soldaa.
El Pont Vegg l'ha veduu e l'ha patii la pupart di guerr combattuu in Lombardia in de l'etaa moderna: l'assedi del 1531, el passagg di lanzichenecch in del 1629, i battali di guerr napoleonegh in del 1799-1800. In 'sta ocasion, i frances hann minaa el pont, e hann faa soltà per aria i dò arcad pussee vesin al Mont Barr.
In del 1832 i Austriegh hann traa giò i rocch e i tor per rangià su la strada noeuva che la menava fina a Colegh; in del 1910 gh'è staa traa giò el rest di fortificazzion per permett el passagg di tranvai.
In del secol XX inoltra l'è staa tiraa su el Pont Noeuv, pussee moderna e adatt per i vicciur, e donca el Pont Vegg l'ha perduu la soa importanza. Al dì d'incoeu l'è on pont ciclopedonal, ancaben che fina al 2015 ghe passava ancamò i vicciur.
Alter progett
[Modifega | modifica 'l sorgent]
Wikimedia Commons el gh'ha dent imagin o alter archivi su Pont Vegg
