Palazz Pertusaa
|
Quest articol chì l'è scrivud in lombard, con la Noeuva Ortografia Lombarda |
Palazz Pertusati, anca ciamad Cà Melza Pertusada, l’è stad un palazz a Milan fad su intorna el secol XVII. [1]
Ghe viveva dent la familia Pertusaa almen del 1697: gh'hann abitad dent el Luca, el Carlo, che gh'haveva denter la soa biblioteca, e Franzesch, che gh’haveva una stamparia picinina: l’era descrivud di sgent del temp come vun di edifizzi pussee bei de la soa contrada, quella de la Spiga . [1]
Storia
[Modifega | modifica 'l sorgent]In principi i Pertusaa l'heven tolt in fit, l’han crompad in del 1721 de l'Ospedal Magior, che l'haveva tolt in eredità de l'Ironem Cachen. [1]
El cont Carlo Pertusaa g'ha fad fà denter un elegant giardin simetregh a la franzes, ciamad Erculee per via de una stata de l'Ercol che 'l copa el leon de Nemea, el giardin l’era considerad 'me vun di pussee bei de la cità, e la colonia Arcadi, che a Milan la gh'era del 1704, [2] e de la che el Carlo l'era el pastor per la cità la se trovava despess lì. La presenza di Arcadian l’è stada sugerida anca del desideri de dàgh legitimità a la cà Pertusada, de origin lissandrina, in di oeugg de la nobiltà local e g'ha dad al palazz el soranom de Cà di Muse.[1]
Semper sota el Carlo, el palazz g’ha havud una gran importanza in la coltura la cità, grazzia a la soa biblioteca ben siora, che l’è stada poeu el nucli de la Biblioteca Nazzionala Braidensa, e ai prezziose collezzion d'art: la tradizzion de la pitura l’è stada portada inanz anca de Franzesch, che l'ha fad pussee moderno el palazz e l'ha tegnud una collezzion de varie scoeule italiane e anca fiaminghe. [1]
L’è stad in del 1874, dopo la mort del Franzesch, nevod del poeta dialetal e tradutor omonim, che el palazz l’è passad a la fameja Melza, per una relazzion che la risalva a l'Emilia Pertusada.[1] In del 1890 l'è fada una prima reduzzion del giardin, cont un toch che l'è dad al Pio Istitut di Rachitegh, nucli del futur Gaitan Pini: anca al principi del 1900 ghe sarà un espropi comunal insì de fà una strada in tra la piazza Ferrari e 'l largh Croceta, la via Marchiondi, che anca incoeu l'è minga fornida: del 1924 un alter toch l'è vendud per fà su la Cà de la Meridiana.[3]
In la segonda guerra mondial i bombardament di Liad l'hann lassad cont un frach de dagn e i ered di Pertusaa e di Melz scernissen de tràll sgiò, roba che fann del 1947 [1], e in tra el 1955 e el 1959, in sui so ruvine, tiren su una serie de abitazzion. [4]
Architetura
[Modifega | modifica 'l sorgent]
L'edifizzi el g’haveva trii pian e una faciada, progetada del Simon Canton, che vardava in sul cors de Porta Romana : al pian terra in principi gh'era domà di fenestre strecce ma dopo del 1800 ghe meten una porta-fenestra. [1] El portal d'entrada, a arch, el gh'haveva un pogioeul de ferr batud, cont a sinistra un afrresch de la Vergin atribuid al Giuseppe Nuvolone . [1] Tri pogioeui vegniven foeura del prim pian, quell nobel, e tucc gh'haveven un para-pet, el pussee grand sora el portal. [1]
La faciada l'era caraterizada de colone ioneghe che sporgen, con di cariated e di bass-rilev.
L’interno del palazz l'era in stil baroch-rococò e 'l gh'haveva di plafon dor e porte sciore e piturade de bianch, cont anca varie statue e piture. [1]
Se podeva andà denter de una cort picina dopo del portal, e se andava su 'na gran scala quatada de stabilidura del secol XVIII. [1]
El giardin d'Arcadia
[Modifega | modifica 'l sorgent]Il giardin de l'Arcadia, incoeu privad e visitabel domà di noeuve abitazzion, l'è quell che resta de l'antigh palazz: in origin giardin a l'italiana, a mità del secol XIX l'è trasformad in d'un giardin a l'inglesa.
Despoeu de la Prima Guerra Mondiala l'è sernid de andà inanz a tutelà e a valorizà el giardin, cont el trà sgiò di costruzzion pussee noeuve e a schivànn l'edifegazzion, el tut l'è formalizad cont un'intesa del 1926 in tra el Comun, i sorelle Melzi e 'l Pio Istitut di Rachitegh, che 'l met fina anca al slongament de la via Marchiondi. [1]
Del giardin se va dent un restell antigh in ferr batud, ciapad forsi di ruvine del palazz originari. [1]
Note
[Modifega | modifica 'l sorgent]- ↑ 1,00 1,01 1,02 1,03 1,04 1,05 1,06 1,07 1,08 1,09 1,10 1,11 1,12 1,13 Giardino d'Arcadia
- ↑ «Braidense».
- ↑ Milano | Crocetta – Palazzo Pertusati e il Giardino dell’Arcadia
- ↑ Lombardia Beni Culturali
Alter proget
[Modifega | modifica 'l sorgent]
Wikimedia Commons el gh'ha dent imagin o alter archivi su Palazz Pertusaa
