Ostrogoti

De Wikipedia
Va a: navegá, truvá
Chest artícol a l'è scricc in Lumbàrt Orientàl, ortograféa unificàda Lombard oriental
El régn dei Ostrogoti 'n Italia.

I Ostrogòti i éra en pòpol germànich che s'ìa furmàt dopo la separasiù dei Gòti atestàda zamò 'ndèl 291[1].

I Gòti che gh'ìa nat a stabilìs sö la spónda orientàla del fiöm Dniestr,[2] endèle tère entùren al mar Négher (teretóre che al dé d'encö i è part de la Ucraina e de la Bielorüsia), i gh'ìa furmàt 'na sórt de confederasiù coi pòpoi de le stèpe e i éra cunusìcc a l'época col nòm de Greutungi[2]. Chèsti i éra stacc cunquistàcc e sutumitìcc dei Uni zamò 'ndel 375, co la scunfìta del rè Ermanarico, e i è restàcc sóta la duminasiù Una 'nfìna a la Batàia del fiöm Nedao, combatìda envers la fì del 454 o al prensépe del 455, co la quàla i è riàcc a ricunquistà la sò 'ndipendènsa.

Endel an 474 vé iligìt come rè Teodorico el Grant, che 'l deentarà el piö famùs dei rè ostrogòti. Gh'è stat divèrsi perìodi de guèra e de trégua 'ntra lü e l'emperadùr bizantì Zenone. Endel 488, Teodorico el g'ha envadìt l'Itàlia e 'ndèl 493 el g'ha scunfigìt Odoacre, alùra rè d'Itàlia, endena batàia sö l'Ada.

Dòpo la mórt de Teodorìco endel'an 526, la sitüasiù l'è deentàda isé violènta che 'ndèl 535 l'emperadùr bizantì Giüstinià I el g'ha mandàt el sò generàl Belisario cùtra i ezèrcicc dei Ostrogòti 'n Itàlia. La süperiurità del ezèrcit bizantì l'è stàda la ciàf per la sterminasiù e e l'eliminasiù de la rezistènsa ostrogòta.

A la fì, el pòpol ostrogòto el vegnarà asimilàt en bris a la ólta de ótre tribù germàniche, compàgn dei Vàndali e dei Frànch.

Riferimèncc[Mudifega | mudìfica 'l sorgènt]

  1. Herwig Wolfram, "History of the Goths", trans. T. J. Dunlop (Berkeley, University of California Press, 1988)
  2. 2,0 2,1 Waldman, Catherine; Mason, Carl (2006). "Encyclopedia of European Peoples". Infobase Publishing. p. 574. ISBN 9781438129181