Numer intreg

Quell articol qì l'è scrivud in Lombard, cond l'ortografia Scriver Lombard.

I numer intreg ( o anca nœmer intreg ) i è una estension dei numer naturai formada per i numer naturai (1,2,3...), i sœ corespondents negativ (-1,-2,-3...) e ol numer 0 (nulla). L'insema de tuts i intreg jeneralment al se denota per 'l simbol $\mathbb {Z}$. I numer intreg i è un subinsema dei numer razionai.

Per somar duu numer intreg de l'istess segn, se soma i valor assoluds dei somants e se met l'istess segn dei somants. Per somar duu numer intreg de diferent segn men, se resta i valor assoluds dei somants e se met a'l resultad ol segn del somant q'al g'ha ol valor assolud major.

Per restar duu numer intreg se soma ol prim a l'opost del segond. Es.: (-5)-7 = (-5)+(-7) = -12

Par multiplegar duu numer intreg, se multiplega i valor assoluds dei fator. Se i è de l'istess segn se met el segn positiv, se i è de segn diferent se met el segn negativ.

Per divider duu numer intreg : al coventa qe vun al sies multipel de l'oltr, se divid i sœ valor assoluds. Se i è de l'istess segn se met el segn positiv, se i è de segn diferent se met el segn negativ.