Articol di 1000 che tucc i Wikipedie gh'hann de havégh

Noeuva Zelanda

De Wikipedia
Salta a la navigazzion Và a cercà
Lombard Quest articol chì l'è scrivud in lombard, con la Noeuva Ortografia Lombarda
La noeuva Zelanda in su la mapa.

La Noeuva Zelanda (New Zealand in ingles, Aotearoa in maori) a l'è un paes de l'Oceania, in del sud-ovest de l'Ocean Pacifegh. El Stat a l'è fad su de do isole principai: l'Isola del Nord (o Te Ika-a-Māui) e l'Isola del Sud (o Te Waipounamu) e de pussee de 700 isolete pussee piscinine. El paes el gh'ha una superfis de 268.021 km² e una popolazzion de 5.127.390[1] persone. La capitala a l'è Wellington, ma la cità pussee granda e popolada a l'è Auckland.

La bandera de la Noeuva Zelanda

La Noeuva Zelanda la gh'ha do lengov ofizziai: l'ingles, che l'è parlad del 98% de la popolazzion, e 'l maori, che l'è parlad del 4% de la popolazzion, poeu la gh'è la lengua di segn de la Noeuva Zelanda[2].

Etimologia[Modifega | modifica 'l sorgent]

El prim europee a vedé la Noeuva Zelanda, l'esplorador olandes Abel Tasman, el ciama i isole Staten Land, perchè el pensava che eren part de l'Isola di Stat, in sud America. L'Hendrik Brouwer l'ha provad che quella sud-americana a l'era un'isola piscinina in del 1643, e inscì i cartograf olandes hann renominad la terra descoverta del Tasman 'me Nova Zeelandia in latin, per la provincia olandesa de la Zelanda.

Storia[Modifega | modifica 'l sorgent]

I isole de la Noeuva Zelanda a inn stade i ulteme grande masse abitabel indova che i omen a inn rivad. In tra el 1280 e el 1350 i polinesian hann tacad a rivà e a fermàss in sui isole e hann desvilupad poeu una coltura Māori separada. In del 1642, l'esplorador olandes Abel Tasman a l'è stad el prim europee a vedé la Noeuva Zelanda. In del 1840, representant del Regn Unid e capi Māori hann firmad el Tratad de Waitangi. In del 1841, la Noeuva Zelanda la diventa una colonia de l'imper britanegh.

Geografia[Modifega | modifica 'l sorgent]

El mont Aoraki/Cook

La Noeuva Zelanda la se troeuva a circa 2.000 chilometer a est de l'Australia travers el Mar de Tasman e a 1.000 chilometer a sud di isole de la Noeuva CaledoniaFigi, e Tonga. A nivell geografegh el paes a l'è un rosc de isole, cont i do isole principai (Isola del Nord e Isola del Sud) che a inn spartide del Strecc de Cook, e dopo de quei chì i cinch isole pussee popolade a inn l'Isola Stewart (terza pussee granda del Stat), l'Isola Chatham, l'Isola de la Granda Barrera, l'Isola D'Urville e l'Isola Waiheke. El paes el gh'ha circa 15.000 km de costa e per via di so isole e di so coste, la so zona esclusiva economega a l'è vuna di pussee grande in del mond, de fad la se spantega per squas quindes voeulte la so superfis de terra.

L'Isola del Sud a l'è la massa de terra pussee granda de la Noeuva Zelanda, a l'è spartita di Alp del Sud. A gh'inn 18 guzze sora i 3.000 meter, el mont pussee volt a l'è l'Aoraki/Mont Cook con i so 3.724 meter. L'Isola del Nord la gh'ha manch de mont, ma inscambi la gh'ha pussee de volcan, 'me l'ativa zona volcanega de Taupō.

I cità pussee important e popolade a inn Auckland, Wellington, Christchurch e Dunedin.

Organizazzion politega[Modifega | modifica 'l sorgent]

La Noeuva Zelanda a l'è un regn del Commonwealth: la regina a l'è el Carl III del Regn Unid e la prima ministra a l'è la Jacinda Ardern (del 2017). El paes a l'è organizad in 11 consili regionai e 67 autorità territoriai. El regn de la Noeuva Zelanda el ciapa denter anca Tokelau (un territori dipendent); i Isole Cook e Niue (paes liber associad); la Dipendenza de Ross, che l'è la part de territori de l'Antartid reclamada.

Note[Modifega | modifica 'l sorgent]

  1. "Population clock", Statistics New Zealand
  2. New Zealand Legislation

Alter proget[Modifega | modifica 'l sorgent]