NeXTSTEP
|
Quest articol chì l'è scrivud in lombard, con la Noeuva Ortografia Lombarda |
NeXTSTEP a l'è stad un sistema operativ orientad ai oget e multitasking desvilupad de la NeXT del Steve Jobs per i so workstation, o ben la NeXTstation e 'l NeXTcube, in tra el 1986 e 'l 1995. Unix-like, el doperava el kernel Mach, el lenguagg PostScript per l'interfacia grafega, el lenguagg Objective-C e librarie orientade ai oget, che gh'hann dad la soa fama.
A l'è stad anca el sistema che l'ha mitud per la prima voeulta el dock, deventad poeu vun di pont pussee important del macOS, sistema che l'è stad desvilupad a partì de NeXT dopo che la Apple l'ha crompad NeXT per sostituì el so vegg Mac OS classegh, dopo havé valutad di alternative compagne de BeOS. El prim browser web, WorldWideWeb, l'è stad desvilupad propi in su 'sto sistema operativ.
La comunità open source l'ha desvilupad GNUstep e Window Maker, che permeten de imità l'ambient de desvilup e grafegh de NeXTSTEP.