Milan 2

De Wikipedia
Sata a-a navegassion Sata a-a serchia
Lumbard ucidental Quest articol chì l'è scrivuu in lombard, grafia milanesa.
El laghett de Milan 2

Milan 2 (Milano 2 in italian) a l'è 'n quarter residenzial de Segraa, faa su in di agn '70 de la Edilnord del Silvi Berluscon.

Geografia[Modifega | mudìfica 'l sorgènt]

Milan 2 a l'è a nord-est de Milan, arent al center cittadin de Segraa, sora de 'na collina generada del Lamber. A l'è saraa in tra l'Ospedaa San Raffael a nord, el Parch Lamber a ovest, el Golf Agricol a est e la Strada Provinciala Cassanesa a sud, che 'l separa di Lavanderij. La Moschea de Segraa a l'è a ridoss in tra Milan 2 e Segraa.

Storia[Modifega | mudìfica 'l sorgènt]

El center a l'è staa faa su in tra el 1970 e 'l 1979 in su progett di architett Giancarlo Ragazzi, Giuseppe Marvelli, Antonio D'Adamo, Enrico Hoffer e Giulio Possa, in su di terren comperaa in di tard agn '60 de la Edilnord deciaraa poeu, in del 1971, destinaa a scopo residenzial del comun, che l'ha poeu daa i licenz edilizzi. El Berluscon, cont on'azion de lobbying, l'ha faa spostà di rott del reoport de Linaa che passaven sora la zona e che avarien sbassà el valor del compless.

Controversij[Modifega | mudìfica 'l sorgènt]

In del 2010 el Massimo Ciancimino, fioeu del boss mafios Vito Ciancimino, l'ha deciaraa che Cosa Nostra l'avaria investii di danee in del compless.

Modell residenzial[Modifega | mudìfica 'l sorgènt]

El modell residenzial de Milan 2 a l'è staa desviluppaa per vess in contrast cont el modell in voga in quej agn, i sò lign guida a hinn:

  • Ampi spazzi verd, che in di città de l'epoca ghe seren no
  • On sistema viari partii in trii part: Pedonal, ciclistich e automobilistich, intersecaa el men possibil
  • 'Na strada centrala cont la pupart di servizzi
  • 'Na pianificazion che la tegn cunt di esigenz abitativ ma anca di servizzi

El quarter a l'è faa su de 28 residenz, federaa in del supercondomini che l'è propietari di spazzi comun, e de 'n center direzional de 7 edifizzi, tucc intitolaa a di personagg del Renassiment. Gh'è anca on circol sportiv, on obergh, on center civich, on residence, 'na scoeura, 'n parch di gioeugh, 'n offizi postal e 'n center religios cattolich.

Television[Modifega | mudìfica 'l sorgènt]

Per mett minga di antenn, retegnuu brutt, a l'è staa mittuu 'n sistema de television via cav in sul che in del 1974 el Giacomo Properzj, futur sindegh de Segraa e president de la Provincia de Milan, l'ha fondaa Telemilan, 'na red piscininna per i gent de la zona che inscì podeven seguì la messa e i attività ricreativ. La television a l'è poeu rilevada del Berluscon 'me pagament di ficc indree e la deventa Telemilan 58, che 'l deventa poeu Canal 5. Finna al 2016 la Mediaset la gh'eva di studi al Palazz di Zign, poeu bandonaa: Incoeu la gh'ha domà di offizi in del Center Direzional.

Bibliografia[Modifega | mudìfica 'l sorgènt]

Vos corelaa[Modifega | mudìfica 'l sorgènt]