Lengua gallica

Quest articol chì l'è scrivuu in lombard, grafia milanesa.

El gallich a l'è staa ona lengua celtega (incoeu descomparida), che l'era parlada in di territori che incoeu corresponden a la Francia e a l'Italia del nord, prima de vess sostituida del latin.
A cognossom quaicoss de quella lengua chì grazzie a vari iscrizzion in su la preja, vas de ceramega, moned e in sul metall. Inoltra a poeudom trovà testimonianz del gallich in de la toponomastega di paes indè che l'era parlada, oltra che a on quai termen che l'è resistii in di lengov locai (frances, ocitan, catalan, lombard...).

Storia

El gallich a l'è consideraa vuna di variant del celtegh continental (diferent de quell insular), insema al celtiberich, el lepontegh e 'l galata.
I primm iscrizzion che cognossom a hinn del VI secol a.C. e hinn in lepontegh (che despess l'è consideraa on dialett del gallich). L'è staa scrivuu cont i abecee italich, gregh e latin.
A daggh a trà al San Grigoeu de Tours, a gh'era anmò on quaivun che 'l parlava quella lengua chì invers a la fin del VI secol.

Lessegh

Confront cont i olter lengov indoeuropei

epos, cavall (cf. latin equus, irlandes each)
mapos, fioeu (cf. irlandes mac, todesch mädchen)
touta, tribù (cf. irlandes tuath, galles tud, latin totus, anglosasson théod)

Paroll de origin gallica

Per savenn pussee, varda l'articol Storia de la lengua lombarda.

Come emm giamò scrivuu, a gh'è on bell rosc de paroll gallich che, a travers del latin, hinn passaa anca in d'ona quai lengua moderna: per esempi el frances, el lombard, ma anca l'ingles.

beccos (cf. latin buca) -> lat. beccum -> becch (it. becco, fr. bec, ingl. beak)
brennos -> brenn (fr. bren, pms. bren, lig. brénno, ingl. bran)
bulga -> bolgiott (fr. bouge, it. bolgia, ingl. bulge)
karros -> lat. carrus -> carr (it. carro, fr. ant. carre, ingl. car)
kramon -> lat. cramum -> crema (fr. crème, it. crema, ingl. cream)
pettia -> it. pezza, fr. pièce

Varda anca