Invasion russa de l'Ucraina

De Wikipedia
Lombard Quest articol chì l'è scrivud in lombard, con la Noeuva Ortografia Lombarda

L'invasion russa de l'Ucraina a l'è scominciada el 24 de fevrer 2022, dopo de 'na longa crisi che l'ha vist la Russia meter un bell numer de soldad in sul confin e, poeu, el recognossiment di republeghe separatista de Lugansk e Doneck, che hann domandad jut a Mosca che l'ha donca lanziad l'ofensiva, con l'obietiv deciarad de "demilitarizà" e "denazifegà" l'Ucraina.

L'atach, partid di confin con la Russia e la Bielorussia e in violazzion del Memorandum de Budapest in su la sigurezza del Pajes, l'è stad fad de terra e de l'aria, con di missil che hann colpid tut el Pajes, inclusa la capital Kyiv e la zona de Leopoli, indova che la pupart di Pajes l'haveva spostad i so imbasciade, e poeu l'è stad fad anca via aqua, in del Sud del Pajes.

El Putin l'ha menasciad che quei che se sarien mitud contra havarien pagad un "prezzi senza precedent", la comunità internazzional comunque l'ha reagid con di dure sanzion contra la Russia, e i borse inn andad propi in bass, insema al rublo, che però poeu l'è stad bon de reciapàss, anca se cont un'inflazzion propi volta e 'n borlà del PIL stimad squasi del 10% per la Federazzion Russa. I Nazzion Unide hann deciarad che l'atach l'è in violazzion di lesg di nazzion.

La guerra l'ha portad a 'na vera e propria crisi umanitaria, con milion de refiguad che hann lassad l'Ucraina o inn andad via de la soa cità, anca se cont el temp vari ucrain inn tornad.

In principi, la Russia, sostegnuda di trupe de l'Ossezzia del Sud e di Kadyrovci cecen, cont el sostegn tategh bieloruss, l'era stada propi bona de entrà in del Pajes, a otegnì posizzion mìnga de poch in l'Est de l'Ucraina e a rivà a poch chilometer de la capital, ma poeu vari problema de logistega e la resistenza Ucraina hann menad l'Armada russa a perder semper pussee territori, anca se, al 19 de masg, controllen comunque un bell toch de la zòna oriental e meridional del Pajes, con cità compagne de Mariupol, Melitopol e Cherson sota el so controll. I forze armade de l'Ucraina hann inveci ricevud un bell poo de jut di Pajes amis, soratut quej ocidentai e vesin a la NATO, e a combater insema a lor gh'eren anca di volontari internazzionai, che i forze armade hann inquadrad 'me Legion Internazzional de Defesa Territorial, in tra de lor anca di unità russe e bielorusse contrarie ai so governi, compagne de la Legion "Libertà a la Russia", i cecenista del batalion Sheikh Mansur e del batalion Dzhokhar Dudayev e 'l batalion Kastuś Kalinoŭski, fad su de bieloruss che hann difendud Kyiv.

Riferiment[Modifega | modifica 'l sorgent]

Vos corelade[Modifega | modifica 'l sorgent]