Gratacel Pirelli

De Wikipedia
(Rimandad de Grattaciel Pirelli)
Lombard Quest articol chì l'è scrivud in lombard, con la Noeuva Ortografia Lombarda
El Pirellon

El Gratacel Pirelli o anca Palazz Pirelli, ciamad informalment El Pirellon a l'è on palazz de Milan, indova che 'l se reuniss el Consili Regional de la Lombardia e, fin al 2011, anca la Sgionta.

L'è in Piazza Duca d'Aosta, arent a la Stazzion Centrala de Milan, e l'è volt 127,10 meter. Dal 1958 al 1966 a l'è stad el gratacel pussee volt de l'Union Europea, superad da la Tour du Midi, a Bruxelles.

Storia[Modifega | modifica 'l sorgent]

L'è stad prosgetad in del 1950 per vesser part del noeuv Center Direzzional, e a l'è stad fad su in tra 'l 1956 e 'l 1961 de prosget del Gio Ponti, el Giuseppe Valtolina, el Pier Luigi Nervi, l'Antonio Fornaroli, l'Alberto Rosselli, el Giuseppe Rinardi e l'Egidio Dell'Orto. L'è on'oeuvra del razzionalism italian e cont i so 127 meter, a l'è vun di palazz in botum pussee volt del mond.

A l'è stad prosgetad per vesser la sed de la Pirelli, per poeu vesser comprad da la Region Lombardia in del 1978, per diventà la noeuva sed, despoeu di cambiament del Bob Noorda.

L'è vun di simboi pussee cognossud de Milan e, fin al 2010, el sò palazz pussee volt, superad in del 2010 dal Palazz Lombardia e, in del 2011, da la Torr Unicredit.

L'è stad de ispirazzion per on frach de gratacei, 'me per esempi per el Telefunken-Hochhaus.

El 18 de april del 2002 un reoplan de turism guidad del Luigi Fasulo, 67 agn, el se s'centra contra el 26º pian del palazz per una serie de error. Quell disaster chì l'ha causad tri mort: el pilota e do done, l'Anna Maria Rapetti e l'Alessandra Santonocito, che lavoraven per la Region Lombardia. Incoeu al 26º pian el gh'è el "Luogo della memoria" (Sit de la memoria), dedicad ai persone che gh'hann perdud la vita.

La Madonina[Modifega | modifica 'l sorgent]

La tradizzion milanesa la dis che nissun palazz el gh'havaria de vesser pussee volt de la Madonina del Dom, e in di agn '30 a l'è divegnuda anca una lesg comunala. Quand l'è stad fad su el Palazz a l'è stada metuda, per respet, ona cobia de 80 centimeter in sul tecc.

Vos corelade[Modifega | modifica 'l sorgent]

Alter prosget[Modifega | modifica 'l sorgent]