Giovan Battista Bolza
|
Quest articol chì l'è scrivud in lombard, con la Noeuva Ortografia Lombarda |
El Giovan Battista Bolza (Lovee, 3 de agost 1801 - Viena, 26 de sginer 1869) a l'è stad un leterad e poeta lombard.
Biografia
[Modifega | modifica 'l sorgent]Member de la familia comital di Bolza, rivada de la Spagna in del secol quell de XVII e che la gh'ha havud in tra i so fil anca el Luis Bolza, de che l'era no parent strecc, l'ha studiad prima al collegi Ghislieri a Pavia e poeu al Ginnasi de Com per poeu laureàss a Pavia in del 1820. L'ha lavorad fina al 1825 'me suplent in del Licee de Com quand che poeu el se trasferiss a Viena, indova che 'l lavora in la ministrazzion imperiala.
La soa atività leteraria la gh'haveva 'me obietiv quell de ligà insema Austria e Italia e l'ha voltad un poo de test del todesch a l'italian e l'ha fondad la "Rivista viennese", un trimestral che 'l publegava contegnud in su la coltura e leteradura di dò Pajes, soratut per spantegà la coltura todesca in del Regn Lombard-Veneto.
In del 1839 el se marida con la Eugenie Ritter, fioeula de 'n bancher. L'ann prima l'haveva probabilment publegad, in su la soa Rivista, una poesia in dialet milanes in onor de l'Imperator Ferdinand che 'l vegniva a Milan, scrivuda in d'un milanes colt de koiné.
In del 1841 l'è spostad al Consili de Stat, indova che l'è nomnad ofizzial in del 1843. Quand che l'è desligad el Consili de Stat in del 1850 l'è mitud a lavorà 'me archivista e subit dopo l'è mitud in la Comission per el reorden di Studi del Regn e 'l va 'n poo in sgir per l'Italia per cognosser i alter sistema scolastegh.
In tra la fin del 1850 e 'l principi del 1851 l'è nomnad maester d'italian de l'imperator Francesch Giusep I e inscì el strengg di boni raport con la Familia Imperial.
In del 1856 l'è incaregad secretari ministerial, roeul che 'l gh'ha fina a la pension, in del 1860. El dopera el temp 'me pensionad cont di alter traduzzion e coment fina a la mort.
Riferiment
[Modifega | modifica 'l sorgent]Alter proget
[Modifega | modifica 'l sorgent]
Wikimedia Commons el gh'ha dent imagin o alter archivi su Giovan Battista Bolza
