Gianda (anatomia)

De Wikipedia
Salta a la navigazzion Và a cercà
Lombard Quest articol chì l'è scrivud in lombard, con la Noeuva Ortografia Lombarda
bussola Disambiguazión – Se te see dree a cercà el frut de la roghera, varda Gianda (frut).
Gianda sotamandibolara umana. A la drizza a gh'è un grup de acin mucos, a la manzina un grup de acin sieros.

I giande inn orghen secretor che serven a la liberazzion de sostanze utel a l'organism. L'unitaa fonzionala, o parenchima, de la gianda l'è representad de un epiteli giandolar in associazzion a una porzion conetivala (stroma) de sostegn e trofega, per podé ospità e render possibel el transit de una red sanguigna de nudrizzion e di terminazzion nervose.

In bas al fin del secred i giande se spartissen in du tip:

  • giande endocrine, che riversen i secred in di liquid de denter del corp;
  • giande esocrine, che riversen el secred de foeura del corp o in cavitaa conligade a foeura.
Un diagram che 'l mostra i diferenze in tra i giande endocrine e esocrine.

Tute e do quei tipologie de giande chì inn compagne per l'origen: tute e do vegnen de un epiteli de quatadura che el se prefonda in del miconetiv de sota. Per i giande esocrine, a inn in gener pluricellular (a ecezzion de la cellula mucipara calciform) e poeudom spartìie in do unitaa: adenomer e dot escretor. L'adenomer a l'è l'unitaa che la secern de la gianda, o ben che la produs el secred. Quella porzion chì, o de tute i manere la gianda medema, la resta conligada a l'epiteli de che la gh'ha havud origen cont el dot, de denter del che el vegn reversad el secred. Quella chì la costituiss l'organizzazzion de una gianda esocrina. Per la gianda endocrina, la modalitaa de origen a l'è la medema, foeura che per el fat che se perd el conligament con l'epiteli d'origen (se distingu né un dot escretor né un adenomer) e che el parenchima giandolar el se organizza intorna a una granda red capillara sinusoidala a l'interna de la che imeten el so secred, o ben l'ormon.

Gianda esocrina[Modifega | modifica 'l sorgent]

I giande a poeuden vesser classifegade in bas a vari parameter: in bas al numer de cellule che ie componen in:

  • unicellular inn costituide de un'unega cellula, o ben la gianda la se identifega con quella. In de l'om quell tip de giande chì a l'è representad domà di cellule mucipare formade de una porzione streccia e una part indova el se acumula el secred. A gh'inn in de la mucosa intestinala e in quella respiratoria
  • pluricellular: l'adenomer a l'è costituid de pussee cellule.

I pluricellular a se poeuden classifegà in bas a la modalitaa con la che el vegn liberad el secred in di giande:

  • apocrine: el secred el se acumula in de la porzione apicala de la cellula sota forma de granui minga quatad de membrana. Al moment de la secrezzion, la membrana plasmatega la va denter e la se fond a costituì un'unega granda vessigola de secrezzion, la cellula la perd una part de citoplasma e de membrana plasmatega.
  • merocrine o ecrine: inn i pussee comun. El secred el se acumula sota forma de granui quatad de membrana e el vegn mandad foeura cont i comun process de esocitos.
  • olocrine: (del grech holos, tut), l'integra cellula la concor a la secrezzion: el secred el se acumula in de la cellula che la va via via in degenerazzion in fina a costituì lee medema el secred. In de la secrezzion olocrina (che la vegn per esempi in di giande sebacee) la cellula la se perd, donca a gh'hann de vessegh di element de reserva, i cellule staminai, che con la duplicazzion e diferenziazzion, mantegnen inalterad l'asset cellular.

In fonzion de la natura chimega del secred a se recognossen giande:

  • sierose: el secred a l'è una sostanza sierosa fluida e a carater in prevalenza enzimategh. I cellule sierose a inn caraterizzade de desvilupad reticol endoplasmategh granular (responsabel de la basofilia citoplasmatega) e compless de Golgi. El secred a l'è amassad in de la porzion apicala de la cellula coma granuli de zimogen. La cellula sierosa la presenta forma de piramid tronca; el nucleo, in gener redond, en ocupa la part basala.
  • mucose: el secred l'è dens e viscos perchè el contegn mucina che a contat con l'aqua la vegn muco. Quell secred chì a l l'è costituid da mucopolisacarid che cont i comun tecneghe de allestiment istologeghe el vegn res franch e colorad (i mucopolisacarid i gh'hann una pussee granda component sacaridega, inn PAS positiv). En segu che i cellule mucose paren s'ciumose e bianche. Cont un microscopi eletronegh a se poeuden vardà nuclei cellular piscinin e scur, schisciad in de la part basala de la cellula.
  • miste: inn giande che presenten sia cellule sierose che cellule mucose disposte in manera carateristega. De fad, i cellule sierose, a diferenza di mucose, a varden minga a la cavitaa de l'adenomer ma la quaten, e formen quei che vegnen ciamade coma semilune del Giannuzzi o sierose per via de la so carateristega forma semilunara.

I semilune sierose a imeten el so secred denter di capillar de secrezzion, che a inn minga di vas ma di microcavitaa (spece de canalicol) in tra i doce di cellule mucose arente.

I giande a poeuden anca vesser classifegade in

  • intraparietai: resten in del spessor de la pared dal che epiteli de quatadura hann havud origen (per esempi i giande di cripte de Lieberkuhn in de l'intestin). A segonda de la posizzion respet a l'epiteli de origen, quei chì a se poeuden classifegà in intraepiteliai (se resten in del spessor de l'epiteli) o extraepiteliai (se a se situen in del conetiv de sota).
  • extraparietai: a se situen de foeura de la pared del che epiteli hann havud origen ma ghe resten conligade per mezz del so dot escretor (per esempi fidegh e pancreas).

La forma de l'adenomer la costituiss un olter parameter de classifegazzion di giande in acinose, tubular, alveolar. A segonda del raport adenomer/dot escretor a se hann giande:

  • ladine: un adenomer cont el so dot escretor o pussee adenomer che se derven in sul medem dot escretor (in quell cas chì a se parla de giande ramifegade).
  • componide: gh'inn tant adenomer ciaschedun cont el so dot escretor che 'l sboca in dot de caliber via via magior (in olter termen a l'è el dot escretor che 'l se ramifega).

Ghe poeuden vesser di giande de grosse dimension che presenten una so tipega organizzazzion. In quell cas chì la gianda a l'è quatada de un conetiv dens ciamad capsula. De quella chì a se departen di set conetivai (ciamad interlobar) che i spartissen la gianda.

Gianda endocrina[Modifega | modifica 'l sorgent]

Sistema endocrin

L'epiteli giandolar endocrin el produs ormon che vegnen reversad in de l'interstizzi conetival e de chì in del circol del sangh o linfategh. L'ormon a l'è una sostanza che 'l poeul influenzà el metabolism de la cellula (cellula bersai) per la che el gh'ha i recetor. En deriva che i ormon a inn sostanze seletive fiss: per esempi, l'ormon TSH o tireotrop produt de l'ipofis el gh'ha i so cellule bersai domà in tra quei de la tiroid, perchè domà quei i gh'hann i recetor per quell ormon. De quest ultem a l'è de sorapu necessari tegnì in considerazzion la natura chimega, perchè la determina la modalitaa de azzion de l'ormon medem. Gh'inn do tipologie de ormon: steroidee e peptidegh o polipeptidegh. I prim (per esempi i ormon gonadegh e corticosurenai) a inn di derivad del colesterol, lipid minga idrolizzabel e anfipategh; donca a poeuden passà la membrana plasmatega de la cellula bersai e ligàss a un recetor citoplasmategh: el compless ormon-recetor citoplasmategh el determina una serie de modifegazzion metaboleghe. I ormon peptidegh e polipeptidegh a poeuden presentà di grup polar e a poeuden vesser grand; donca, i gh'hann una certa dificoltaa a passà la membrana plasmatega: te chì che alora i se lighen a di recetor de membrana (proteine glicosilade) e quell ligam chì el principia una serie de reazzion a cadena che riven a la trasformazzion de l'ATP in cAMP (adenosinmonofosfad ciclegh). Quella sostanza chì la juta l'ormon, cont el passà a l'interna de la cellula el messagg, o ben a l'è un segond messagger. In olter termen, quell'ultema categoria chì de ormon la agiss travers una trasduzzion del segnal.

I giande endocrine a poeuden vesser spartide in du grup:

  • unicellular che costituissen el sistema endocrin spantegad.
  • pluricellular che se spartissen in:
    • follicolar Costituida de cavitaa sferoidai che la produs la colloid (un preormon). In del corp de l'om en inn esempi la tiroid e la part intermedia de l'ipofis
    • cordonai Costituide de fila de cellule fianchegiade de capillar, tacade de desmosom e ligam strecc. I cordon a inn serciad de tessud conetiv reticolar. En inn esempi adenoipofis, epifis, paratiroid e surenai.
    • a isolot Costituide de "isole" endocrine in del parenchima de un orghen esocrin, per esempi i isolot Langerhans in del pancreas.
    • interstiziai A se hann quand che cellule endocrine a se troeuven sparse in del conetiv di spazi interstizziai de un orghen. En inn un esempi i cellule interstiaziai di gonad (cellule de Leydig in del testicol, teca interna e corp luteo in de l'ovaio).

Ligam de foeura[Modifega | modifica 'l sorgent]

  • (EN) Gianda, in su Enciclopedia Britanega, Encyclopædia Britannica, Inc.